ïap 5 ngut ha jaka ba tih pung ha Lapalang suba ba kylla bih ka lyer na ka tdem ba mih na ka Diesel Pump

Shillong, Naitung 11 : Ha ka janmiet Sngi Thohdieng san ngut ki briew ki la duh ei ïa la ka jongka jingim ha Lapalang ha ka jaka ba tih ïa ka pung kaba jylliew kumba 25 phut ei ei. Ka daw ka jingiap ka dei lehse namar ba ki pyndonkam da ka diesel pump ban ring ïa ka um napoh ka pung shabar bad namar ba la jylliew bad ba ym don oxygen bad ba la jur ka tdem diesel ka lyer ka la kylla bih noh kumta ki la khlad noh hashen.
Kat kum ka jingïathuh u Rangbah Shnong ka Lapalang u la ïathuh ba ki don saw ngut kiba tih ïa katei ka pung bad katba ki dang ring ïa ka um shabar napoh ka pung namar ba ka la dap um, la jur palat katei ka tdem diesel pump, kumta lai ngut ki la iap noh hashen bad uwei u la ïoh ban mih noh shabar. Haba u la ïoh mih ula pyrta briew ban wan ïarap bad kumta ki marjan kiba ïoh sngew ki la wan sha katei ka jaka bad arngut na ki ki la pyrshang ban ïarap da kaba ki mut ban hiar shapoh ka pung ban sei ïa kitei ki lai ngut hynrei kitei ki arngut ruh ki la ngat ha ka juh ka apot da kaba ka tei ka lyer ba la kylla bih ka la ktah ïa ki bad ki ruh ki la khlad noh shapoh katei ka pung.
Hadien kane la pyntip sha ki bor pulit halor ka jingjia bad kumta ki pulit ki la wan ban sei ïa kitei ki metiap bad pynkit ïa ki sha Civil Hospital na ka bynta ban pyndep ïa ka post mortem.
Na ka liang u Rangbah Shnong ula kyntu ïa ka sorkar ba kan leh ei ei halor kane ka jingtih pung da kaba ka dei ban buh da ka SOP kaba biang khnang ban ym jia kum kine ki jingjia hadien habud.