Hukum ka ïingbishar ïa ka NHAI ban bishar bniah ïa ka rukom mait jaka khun kali ha surok Khanapara-Jorabat

Shillong, Naitung 11 : Ka ïing Bishar High Court ha ka sngi Thohdieng ka la pynwai ïa ka mukotduma halor ka jingmait jaka khun kali (median opening) ha surok NH-27 ha Khanapara-Jorabat, haba bthah ïa ka National Highway Authority of India (NHAI) ba kan peit pyrkhing bad bishar bniah bha khnang ban khanglad ïa ka jingmait jaka khun kali ba khlem ïoh jingbit.
ïa kane la hukum da ka ïing Bishar u Justice HS Thangkhiew haba shong bishar ïa ka mukotduma bala ujor da ki nongshong shnong ka Jorabat bad Khanapara.
Ka jingmudui pyrshah ïa ka jingkhang ïa ki jaka khun kali da ki bor Sorkar ka Assam bad kyntu ba kino kino ki jingpynkylla ki dei ban wan da ka jingai jingbit ka NHAI.
U nongïasaid aiñ ka NHAI, u A Duarah, ula pyntip ha ïing Bishar ba kane ka kam ka la kylla long ka bym donkam shuh namar ïa ka jaka khun kali ha CRPF gate No 1 bad Gate-2 lah plie biang mynta.
Hynrei u nongïasaid ki nongmudui S Sen ula kdew ba ka jingplie ïa ki jaka khun kali ba khlem ïoh jingbit hajan ka Montfort School bad Jorabat Police Station ki dang don, ïa kaba la leh da ki Pulit Assam khlem ka jingai jingbit ka NHAI.
Ula kdew ïa ka Work Manual 2006 jong ka NHAI , kaba donkam ban khang mardor ïa ki jaka khun kali ba khlem ïoh jingbit bad ban leh eiei pyrshah ïa ki agency kiba donkti.
Ka Jylla, kaba la mihkhmat da u AAG ND Chullai, ka la mynjur ba kino kino ki jingpynkylla ïa ki jaka khun kali ka dei ban ïaid kat kum ki kyndon treikam ka NHAI bad dei ban leh ruh da ka jingtip jong u Superintendent of Police ka Ri Bhoi District.
Haba pynwai ïa ka mukotdma, ka ïing Bishar ka sngew ba ki jingpom jaka khun kali ba khlem ïoh jingtip ka dang dei ka mat kaba sngewkhia. Ka la bthah ïa ka Regional bad Project Office ka NHAI ban peit thuh pyrkhing bha bad ban tehlakam ïa ki jaka khun kali ha surok NH-27.