Tur kynsan ka MGSPHSVA sha ka ophis Municipal dawa ban thaw mardor ïa ka TVC ba pura

Shillong, Naitung 10: Ki dkhot jong ka Meghalaya & Greater Shillong Progressive Hawkers and Street Vendors Association (MGSPHSVA) ki la pynlong ïa ka jingïakhih ha ka sngi palei, da kaba dawa ban thaw noh mardor ïa ka Town Vending Committee (TVC) kaba pura.
U General Secretary ka Association u Bah Shane Thabah u la ong ba kane ka jingwan ban tur sha ka ophis jong ka Shillong Municipal Baoard ka dei namar ba la kut ka por jong ka Provisional Town Vending Committee (PTVC).
“Ïa ka PTVC la thaw shisnem bad ka samoi treikam jong ka ka la kut lypa.Ngi dawa ïa ka TVC ba pura namar ïa ki rai ym shuh ban shim lang, uwei u rangbah ha ka PTVC u shim rai marwei, kane ka long kaba be-aiñ bad ka pyni ba kam don ka jingburom ïa ka komiti kaba la don lypa”, la ong u Thabah.
U la ong ba katei ka jingleh ka la ktah ïa ki ïew tynrai kum ha Ïewduh, Iew Mawlong bad Motphran.
“Kine ki dei ki Heritage bad Natural Market kiba la don naduh ki pateng bynriew, ka ain ka kren shai ba phim lah ban pynduh ïa ki iew, dei ban pyndonkam ïa ka ain ban pynbeit bad ban ïatreilang, ym ban pynkynriah jaka ïa ki nongdie madan”, u la ong.
U Thabah u la pynpaw ruh ïa ki jingeh ha kaba ïadei bad ka jingpynkynriah jaka bad ka jingai ïa ki Certificate of Vending (COV) khlem da ïamir jingmut.
Da kaba kdew ïa u Laitumkhrah, u la ong ba kawei ka jaka ba la ithuh lang ha ka por ba jurip la “pynkylla” hadien da ki bor ba dei khmih.
“Ngi la mynjur ban pyrshang ïa katei ka jaka watla kam pat biang, namar ngi kwah ban iatreilang bad ka sorkar.Hynrei hadien katto katne sngi la pynkylla ne de-notified noh.Kane ka rukom leh ka pyniap ïa ka jingkyrmen bad ka pynsngewsih ïa ki paidbah”, u la ong.
Halor ka jingpynkynriah ïa ki nongdie jingdie na ka thain MTC, u la kynnoh ba la shim ïa ki rai khlem ka jingmynjur jong ka Committee.
“Ngi la ïakren ban pynkynriah noh ïa ki nongdie marbam sha ka jaka ïeng kali jong ka SMB, ym ïa ki nongdie jaiñ.Hynrei mynta la ai COV ïa ki nongdie jaiñ ban pynkynriah noh sha Polo khlem kano kano ka jingïakren ha ka Committee.Ka rai ka la wan beit beit na ka Ophis ka Municipal” ong u Thabah.
U la kyntu ïa ka sorkar ba kan thaw ïa ka TVC lyngba ka elekshon kloi katba lah.
“Ngi dawa ba dei ban buh noh mardor ïa ka Town Vending Committee kaba pura, bad ban pynlong ruh ïa ka elekshon khnang ba ki kam kiba ïadei bad ki nongdie jingdie ha rud surok kin ym long kiba leh shilliang bad ka rukom treikam kan ïaid shakhmat ha ka rukom kaba dei,” u la bynrap.