Nongpoh, Naitung 10: U Superintendent of Police ka Ri-Bhoi, u la pyntip ba haka janmiet jong ka 05 tarik Naitung 2026 ki pulit ka Byrnihat Police Station kila ioh tam ïa kawei ka met ïap jong uwei u rangbah bym lah ban ithuh kaba la thiah hapoh ka building barim jong ka Sales tax ha Byrnihat Proper hadien ka jingpyntip da ki riew paidbah.
Ha ka jingtohkit ki pulit ïa katei ka metïap, la lap ba utei u briew u dei u bym don iing don sem bad u ba don jingduna ha ka bor pyrkhat u ba ju shang kylleng ka thaiñ Byrnihat, bad na ka liang ki pulit kila rah noh ïa katei ka met sha Nongpoh Civil Hospital, bad ha ka 06 tarik Naitung la leh ruh ïa ka post mortem ban tip ïa ka daw jong ka jingïap utei u rangbah bad hadien katei ïa ka met utei u rangbah la buh noh ha jaka buh metïap ha Nongpoh Civil Hospital.
Katkum ka jingpyntip jong ki pulit la ong ba utei u rangbah u don ka jingjrong kumba 5.3 phut ba udei u ba kham raikhoh, u phong ka patlun lyngkot kaba lieh bad kino kino kiba don jingtip ki lah ban pyntip sha Police Control Room ha u number 9856084514.
