Nongstoiñ, Naitung 09: Ka Ophis jong u Range Forest Officer Mairang Range, ka la pynlong ïa ki ar tylli ki jingkhynra kiba heh ha Eastern West Khasi Hills District ha ka sngi balang, ban khanglad ïa ka jingpyntrei kam beaiñ ïa ki mar kum ki dieng bad shyiap ba la ïoh na ka mariang, khlem da ïoh jingbit ki ba la pyntrei bad pynïaid iew hapoh ka District.
Ka tnad ba dei peit ïa ki kam khlaw ka la pynlong ïa ka jingkhynra kynsan ïa ki karkhana ot dieng ha ka thaiñ sor jong ka Mairang, ryngkat ka jingïatreilang bad ka tnad pulit jong ka District. Ïa kane ka jingkhynra la pynlong hadien ka jingmih khubor ba la jyllei ka jingkhaïi bad shalan dieng bad ki jingujor ba la ïoh na ki kynhun bapher bapher.
Ha kane ka jingkhynra, la lap ba katto katne ki karkhana ot dieng ki treikam khlem ka jingbit ne ki kot ki sla kiba biang na ka bor ba dei peit. La kurup ïa ki dieng kiba bun bha bad ïa ki mashin kiba heh kiba pyndonkam ha ki karkhana ot dieng. Hadien kane la pyndait tala bad tah mohor da ka tnat Khlaw kum ka dak ba kine ki karkhana la khang khyrdep.
Lah ban pynkynmaw ba naduh ka 15 tarik Jymmang 2026 ter ter, ka Ophis jong ka Range ha ryngkat ki bor synshar District, ki la pynlong ruh ïa ka jingleit jurip bad khynra halor ka jingtih shyiap beaiñ ha ki bynta ka Mairang bad kylleng ka EWKH.
Ïa kane ka jingjurip la pynlong hadien ka jingujor na ki khlieh nongsynshar bad ki kynhun bapher bapher ha kaba ïadei bad ka jingkhaïi beaiñ ïa u shyiap, khlem da ïoh jingbit na ki bor pynïaid jong ka District.
Ha kane ka jingjurip, la lap ba ki don katto katne ki jaka tih shyiap kiba pyntreikam khlem ka jingbit na ki bor ba dei khmih. Mar mar hi la pynsangeh noh ïa ki par shyiap beaiñ bad la kurup noh ïa ki tiar ba pyndonkam ban tih shyiap, nangta la kurup ruh ïa u shyiap ba la dep ban lum thup ha ka por ba pynlong ïa ka jingjurip.
U Range Forest Officer, u bah B. M. Kharkongor u la pyntip ba ïa kum kine ki jingkhynra bad jurip la ju leh na ka por sha ka por bad yn dang ïai bteng ban leh nangne shakhmat, ban teh lakam bad khanglad ïa ka jingpyntrei dieng bad tih shyiap beaiñ hapoh ka District.
U la pynshai ba ka tnad kam pyrshah ïa ka khaïi dieng ne shyiap, hynrei baroh ki kam ki dei ban long katkum ki kyndon aiñ ba la buh da ka sorkar.U la bynrap ruh ba ki dieng bad u shyiap ki dei ki marpoh khyndew kiba kongsan na ka bynta ka khaïi pateng hapoh ka District bad ka tnat ka tip bha ïa kane.
U bah Lashanbanjop L.Mawlong, Forester-I bad u bah L. Marthong, MCS, ki la kyntu ïa ki paidbah nongshong shnong ba kin ïatreilang bad ka tnad Forest lem bad ki bor pynïaid District, khnang ban pynthikna ïa ka roi ka par kaba bha bad kaba ïahap ha ka District.
U Range Forest Officer u la pynpaw ruh ïa ka jingsngewnguh ïa ka Local timber association ha ka thaiñ bad ki paidbah, kiba la ai ka jingkyrshan ha ka por ba pyntreikam bad kiba la pynthikna ba kum kine ki kam yn pyntrei tang ha ka rukom kaba dei katkum ka aiñ.
