Khynra trading license ki pulit Enforcement ka KHADC ha thaiñ Pilangkata

Nongpoh, Naitung 21: Ki pulit Enforcement jong ka KHADC mynta ka sngi kila hiar kynsan sha ka thaiñ Pilangkata kaba dei ka shnong khappud ha Ri-Bhoi District bad kumjuh ruh haka thaiñ Byrnihat, hadien ka jingioh jingtip ba bun naki dukan kim don ïaki kot ki sla ba biang (Trading License), ban pynïaid ïaki dukan khamtam sha ki thaiñ khappud jong ka jylla.

Ïa katei ka jingleit khynra la lamkhmat da u Bah F Kharsyntiew Inspector ba dei peit ïa katei ka thaiñ, u Bah B Riahtam Asst. Superintendent bad kiwei kiwei haka jingïatreilang bad ki Dorbar Shnong jong ka Pilangkata A bad B ryngkat ki pulit jong ka Pilangkata Outpost.

Ha katei ka jingleit khynra naka liang kitei ki pulit Enforcement jong ka tnad KHADC la lap ba bun naki dukan naduh ka thaiñ Byrnihat, bad sha ka shnong Pilangkata la lap ba bun naki dukan kim don ïaki kot ki sla ba biang naduh ki trading license ban pynïaid ïaki dukan jong ki bad la shem ba ki dukan ki dei kiba beaiñ khlem da pynbiang ïaki kot ki sla.

Haba ïakren bad u Bah F Kharsyntiew Inspector ba dei peit ïa katei ka thaiñ khappud u la pynpaw ba ka daw bala pynlong ïaki ban leit khynra kynsan mynta ka sngi ïaki kot ki sla jong ki dukan ha katei ka thaiñ khappud ka dei ka jingkyrpad jong ki shnong namar ka jingjyllei jong ki dukan bar jylla kiba khlem kot khlem sla bad khlem da bud ryntih ïaki kyndon jong ka District Council.

U la ong ruh ba hadien ka jinglap ba bun naki dukan kim lah ban pynbiang bad kim don ïaki kot ki sla, naka liang jong ki kila ai por 15 sngi ban pynbiang noh ïaki kot ki sla bad lada kim lah naka liang ka district council kan khang tala noh ïa baroh ki dukan ki bym don ïaki kot ki sla.

Hadien katei ka jingleit khynra trading license sha katei ka thaiñ naka liang ka tnad Enforcement jong ka KHADC kin dang bteng ban pynlong ka jingkhyra sa sha ka thaiñ Khanapara bad kiwei kiwei ki shnong khappud ka Ri-Bhoi.