Mynjur da ka Resolution ha ïingdorbar KHADC ban khanglad ban tih ïa u Uranium: KSU

Shillong Naitung 08: Ka Khasi Students Union (KSU) hynne ka sngi Balang kala leit ïakynduh ïa u Chief Executive Member ka KHADC u Bah Winston Tony Lyngdoh bad aiti ïa ka Dorkhas kaba kynthup ïa ki 3 tylli ki mat jingdawa kiba ïadei bad ka mat jong ka jingtih ïa u marpoh khyndew u Uranium.
Ha ka dorkhas ka KSU kala dawa ba dei ban mynjur da ka rai ne ka Resolution ha ka ïing Dorbar thaw aiñ ban khanglad ban tih ïa u Uranium ha ka jylla bad ba nym ai ïa ka No Objection Certificate (NOC) da lei lei ruh halor kane ka bynta.
“Watla, kum ka jaidbynriew ngi don hapoh ka jingïada jong ka Sixth Schedule bad ngi long trai ïa ka jaka bad ha kajuh ka por ngi long trai ïa ki mar ba hapoh khyndew hynrei ngim lah ban tip ïa ka aiñ ha kaba ïadei bad kane ka bynta namar lehse ka Sorkar India kan lah ban wanrah ïa ka jingïapher hapdeng ka “National Security” bad “Tribal Autonomy”. Ka Atomic Energy Act, 1962 ka ai bor pura ïa ka Sorkar Pdeng ban shimti ïa ki ‘atomic minerals’ kum u Uranium katba ka sngew dei ban leh” la pynpaw ka KSU.
Kala dawa ruh ba dei ban wanrah ïa ka Amendment ha ka “The Khasi Hills Autonomous District (Regulation & Administration of Land) Act, 2021” ne ban thaw da kawei ka aiñ katkum ka Paragraph 3 jong ka Sixth Schedule ba nym shah ban die, ai ai wai (sale/transfer/lease) ïa ki jaka ba don u Uranium sha ka sorkar ne ka kompeni ne riewshimet ban tih ïa u marpoh khyndew (uranium bad kiwei radio-active elements).
Ka KSU kala dawa ruh “Ba ka KHADC ba kadei ban ai jingbthah sha ki Dorbar Shnong ki Dorbar Hima ba kin nym ailad ïa ki briew bad ki heh ophisar bad kiwei ki briew kiba na AMD ba kin ïoh rung sha ki thaiñ jong ka South West Khasi Hills District bad West Khasi Hills District, ha ki jaka ba don Uranium.Kane kan pyntlot bad pynduh ïa ka jingthmu ba sniew jong ka Sorkar India bad ki briew kiba kwah shim kabu ban tih ïa u Uranium”.