ïengskhem ka Sorkar ba ïalam da ka NPP ban ïada ïa ki paid Khristan: Dy.CM
Ka sorkar ba ïalam da u Conrad dei kaba burom ïa baroh ki jait niam
Shillong, Naitung 8 : U Symbud Myntri Rangbah u Ma Sniawbhalang Dhar ha ka Sngi Balang, ula pynpaw ba ka Sorkar ba ïalam da ka National Peoples’ Party (NPP) hapoh ka jingïalam u Myntri Rangbah u Conrad K Sangma ka dei ka sorkar kaba burom ïa baroh ki jait niam bad kumta ka ïeng skhem ban ïada ïa ki paid Khristan ym tang hapoh ka jylla hynrei ha ka ri hi baroh kawei da kaba kan ïai bteng ban sngap bad khmih ïa ki jingeh jingshon jongki kumba la ieng ban pynpaw ia ka jingsngewkhia jur da u Myntri Rangbah bad ki Nongialam Niam hakhmat u Myntri Kam Pohiing ka ri u Amit Shah ha kine ki khyndiat sngi halor ka jingthmu ban wanrah ki jingpynkylla ne Amendment Bill 2026 ha ka Foreign Contribution (Regulation) Act (FCRA).
Haba ïakren bad ki nongthoh khubor, u Ma Sniawbha ula ong ba u Myntri Rangbah dang shen ula ïalam ïa ka kynhun ki Nongïalam Balang ban ïakynduh ïa u Myntri Kam Pohïing ka Ri u Amit Shah ha New Delhi, ban ïakren ïa ki kam ba ïadei bad ka Amendment Bill 2026 jong Foreign Contribution (Regulation) Act (FCRA) kaba ktah ïa ki niam hapoh ka Jylla.
“Hapoh ka jingïalam u Conrad K Sangma, ngi don beit hangne ban ïada ïa la ki jong ki briew, khamtam haba ki mad ïa ki jingeh kiba ïadei bad ki Balang bad ki paid Khristan jong ka Jylla. Ngi don hangne ban ïada bad ban sngap ïa ka sur jong ka jingkyrpad na ki briew jong ngi, bad ngi la leh ïa kata” ong u Ma Sniawbha.
Ula ong ba u Myntri Rangbah ula pynïoh ïa ka por ban ïakynduh ia u Myntri kam Pohïing ka Ri bad da lade hi ula synran ïa ka kynhun ban pynthikna ba ïa ki jingsngewkhia jong ki, la ïoh sngew beit beit da ka Sorkar Pdeng.
“U Myntri kam Pohïing ka ri ula ai ka por ïa u Myntri Rangbah jong ngi. Hapoh ka jingïalam jong u, ula ïalam ïa ki Nongïalam Balang ban buh ïa ki jingkyrpad ba ïadei bad ka FCRA hakhmat u Amit Shah” ula bynrap.
U Ma Sniawbha ula pynpaw ruh ba ka Sorkar hi kan ïeng skhem ban ïada ïa ka bha ka miat jong ki paid Khristan ym tang ha Jylla hynrei ha kylleng ka Ri.
U Symbud Myntri Rangbah ula pynpaw ïa ka jingsngewnguh ïa ka Myntri kam Pohïing ba u kloi ban ïakynduh ïa ka kynhun napoh ka jylla bad u kyrmen ruh ba un sngap bad leh ei ei halor kane ka jingkyrpang ki Nongïalam Niam.