Lyngba ka OTSS, kyntu ka DC sha baroh ban pynbiang noh kloi lïa ki kot kali

Nongstoiñ, Naitung 08: Ka Deputy Commissioner Eastern West Khasi Hills District ka la pyntip paidbah ba ka Sorkar Meghalaya, ka la pynlait ïa ka One Time Settlement Scheme (OTSS) na ka bynta ki kali kamai tang kiba la register hapoh ka Jylla Meghalaya.
Ïa kane ka skhim la wanrah ban ai jingïarap ïa ki trai kali jong ki kali kamai ki bym shym la lah ban siew dep ïa ki khajna kali kiba ïadei bad ka Motor Vehicle Tax, Passenger and Goods Tax bad ka Fitness Fee. Ha kane ka skhim, ki trai kali kamai ki lah ban siew noh ïa ki ram khajna barim da kaba siew tang shi bynta na ka pisa kaba dei ban siew.
Na ka bynta ka Motor Vehicle Tax bad Passenger and Goods Tax kiba dang sah, yn map haduh 80% (waiver) kynthup ïa ka penalty, interest bad kiwei kiwei ki charge. Kumta, ki trai kali kin hap ban siew tang 20% na ka pisa kaba dei ban siew ban pyndep pura ïa ka ram khajna.
Na ka bynta kito ki bym shym la pynthymmai ne pynslem ha ka jingpynthymmai ïa ka Fitness Certificate lane ka syrnod jong ka jingbit jingbiang ka kali, yn map noh haduh 90% (waiver).
Kane ka skhim kan sdang ban treikam na ka bynta ïa baroh ki ram khajna kali kamai ki bym shym la lah ban siew dep naduh ka sngi ba la pynbna ïa kane ka skhim bad ka tarik ba khatduh ban ïoh jingmyntoi na kane ka skhim ka long ha ka 31 tarik Nailar 2026.
Na ka liang ka Tnad Transport ka la buh ruh ka jingmaham na ka bynta ki trai kali bad kiba ju pynïaid ïa ki kali kamai, ba ki dei ban siew dep ïa baroh ki ram kiba ïadei bad ka khajna, fine bad kiwei bad yn lad haduh ka 31 Nailar 2026. Na ka bynta kito ki bym kohnguh, ka office kan leh da kaba tyngeh katkum ka aiñ.
La kyrpad ïa baroh ki trai kali kamai ba kin shim ïa kane ka lad jingïarap da kaba kin leit mih kham kloi sha ka office jong u District Transport Officer, na ka bynta ban tip khambha shaphang kane ka skhim bad ruh ban siew ïa ki ram jong ki shwa ka por ba la buh kata ha ka 31 tarik Nailar 2026.