Da ki jaka theh niut katkum ka juk stad Saïan pynkhreh ka sorkar ha baroh ki Nongbah jong ki District

Shillong, Naitung 8 : Ka sorkar jylla ka la pynkhreh mynta ban tei da ki jaka theh niut kat kum kane ka juk stad Saian ha baroh ki Nongbah jong ki District hapoh ka jylla. Ha Nongpoh ka kam ka la ïaid shakhmat bad ka jingpynkhreh mynta ka long na ka bynta ka sor Jowai, Tura, Williamnagar, Nongstoin, Khliehriat bad ha kiwei kiwei ki nongbah ruh ïathuh u Symbud Myntri Rangbah ka jylla u Ma Sniawbhalang Dhar uba peit ïa ka tnad Urban Affairs bad Municipal haba ïakren bad ki nongthoh khubor mynta ka sngi.
U Ma Sniawbha u la ïathuh ba ka tnad Urban Affairs ka la bthah ïa ki CEO jong man la ki District bad kumjuh ruh ïa ki MLA jong kito ki jaka ba kin ïatrei lang bad wad ïa ka jaka kaba ibiang ban tei ïa kine ki jaka theh niut.
“ Kum u Myntri jongka tnad Urban Affairs nga la dep bthah ïa baroh ki CEO jong ki District bad ia ki MLA jong kito ki jaka ba kin ïatreilang kata naduh Jowai, Tura, Williamnagar, Nongpoh bad ter ter” ong u ma Sniawbha.
“ Nga sngewkmen ban ïathuh ïa phi ba ka jingtrei na ka bynta ka jaka theh niut ha Nongpoh ka la sdang bad la mang ban pynlut haduh 5.80 klur tyngka. Ngin pyrshang ban pynsted ïa ka kam na ka bynta ka Jowai, Khliehriat, Nongstoin, Williamnagar, Tura bad ha baroh hi ki nongbah jong ki District” ong u Symbud Myntri Rangbah.
Ha kaba ïadei bad ka jaka theh niut jong ka nongbah Shillong ha Nonghali, u ma Sniawbha ul a ïathuh la dep pynkhreh lut nadong shadong hynrei ka sahkut noh namar ba ka dang don ha ka jingbishar.
“ Ha ka jingshisha ngi la dep pynkhreh lut nadong shadong hynrei sniewbok ba uwei na ki nongshong shnong ka Nonghali ula ujor sha ka ïing bishar bad na kata ka daw ka sahkut noh kane ka kam hynrei ngi kyrmen skhem ba yn sa ïoh hi ban sdang shen ïa kane ka kam ruh” ong u Symbud Myntri Rangbah.
Na ka bynta ka sor Jowai, ka kam ka la ïaid shakhmat bad shu ap ban ïoh jingbit na ka tnad Forest and Environment bad kumjuh ruh na ka Pollution Control Board.
“ Ngi la pynkhreh lut nadong shadong bad kaba nyngkong eh ka long ban ïoh ïa ka NOC na ka shnong ne ka elaka ba ka jaka ka hap bad hadien kane yn sa pan jingbit na kitei kiwei pat ki tnad bad hadien ba la dep lut nadong shadong yn sa pynlong ka jingsngap ne bishar paidbah” ïathuh u ma Sniawbha.
U la ïathuh ba ki don haduh 3 ne 4 tylli ki jaka kiba la dep leit jurip bad ïa kano yn jied yn sa pyntip ynda la dep lut nadong shadong khnang ban lait na kiba bun ki kynrum kynram.
Baroh kine ki jaka theh niut kin long beit kat kum ka juk stad Saian lym kumta ka NGT kan ym shah ban tei ïa ki, ong u Symbud Myntri Rangbah.