Shillong, Naitung 21 : U Myntri Rangbah ka jylla u Conrad K Sangma u la pynpaw ka jingsngew kmen kaba khraw halor ka jingjop jong ka riew kynthei riewlum ba nyngkong eh ka Draupadi Murmu ban shimti ïa ka shuki President jongka ri. U la ong ba ha kum kane ka sngi u kynmaw ïa ka jingthrang jong u kpa jong u (L) P.A Sangma ban ïohi ia ki riewlum ba kin ioh bat ïa kane ka shuki. Kane ka jingjop jongka ka long kum ka jingpynurlong ïa ka jingphohsniew bad jingthrang jongu kpa jongu. Nalor kata u ai khublei ruh ïa u Myntri Rangbah duh ka ri u Narendra Modi halor ka jingjied jongu ïa ka Murmu kum ka kyrtong jongka NDA sha katei ka shuki President. U kitbok ba ka Murmu kan ai ka jingsynshar kaba hok bad ban peit khamtam ïa ki paid riewlum ha kylleng ka ri India.
Kumjuh ruh na ka liang u bah A.L Hek MLA ka Pynthorumkhrah jongka BJP uba dei u Chairman jongka President Election Committee ha kane ka jylla u la ai khublei ïa ka jingjop don burom jongka Murmu kum ka riewkynthei bad kum ka riewlum banyngkong eh ban kiew sha kane ka shuki President. u bah A.L Hek u ai khublei kit bok kit rwiang ïa ka Mumu ba kan dang lah ban ai ka jingsynshar kaba khuid bad ba khlem noh shilliang khmat khamtam ban phai khmat sha ki paid riewlum jongka ri India.
