Shillong, Naitung, 21: Palat 157 ngut ki nongthep kam ki la shah khang syndon shi junom ban aplai kam ha kino kino ki tnat treikam jong ka Sorkar hadien ba la pynbna ïa ki dei kiba don dak sniew ha ka thungkam jong ka tnat Pule Puthi ha u snem 2009.
Kane ka long katkum ka hukum ba la pynmih da u Commissioner & Secretary u BDR Tiwari ha ka 18 tarik mynta u bnai.
“Ha kaba ïadei bad ka hukum ba la pynmih da ka tnat ha ka 22 tarik, Rymphang, 2022 bad katkum ba la kdew ha ka sla 103, para (2) jong ka hukum kaba la pynmih ha ka 2 tarik, Naiwieng, 2017 jong ka Ingbishar Meghalaya High Court, ki 157 ngut ki nongthep kam kiba la ai jubab, la pynbna ba ki dei kiba don dak sniew da ka Three Members Committee lyngab ka shithi kaba la 14 tarik, Jymmang, 2022 bad nalor kata kin hap ban siew ïa ka kuna bad la khang shisyndon junom ba kin aplai kam ha kino kino tnat treikam ka Sorkar,” ong ka hukum.
La hukum ba kine ki nongthep kam ba la ñiew ba ki dei kiba don dak sniew kin hap ban siew ïa ka kuna kaba T. 50,000 marwei bad kin hap ban thep ïa kane ka pisa ha ka State Disaster Management Fund hapoh 30 sngi.
Ha kajuh ka por, ka Three Members Committee ka la pynbna ruh ïa ki hynriew ngut ki nongthep kam na ki san tylli ki Sub-Division ba kim dei kiba don dak sniew. Halor kane, u Director of School Education & Literacy u la kyrpad ban thungkam biang ïa kine ki hyniew ngut ki nonghikai hadien ba la shem ba kim don dak sniew eiei.
Kane ka Three Member Committee ka la shong bishar bniah ïa ki jubab jong ki 165 ngut ki nongthep kam ba la shah ñiew ba ki don dak sniew na ki san tylli ki Sub Divisions bad la pynbna ba hynriew ngut kim dei kiba don dak sniew bad arngut kiwei pat watla ki dei kiba la palat ka rta hynrei ym shym la lap ba don bynta ha kano kano ka kam leh tuh.
