Shillong, Naitung 21: Ki jaka rep ha ka thaiñ Thangsning shen kin ïoh ïa ka um kaba pahuh lyngba ka projek ba la wanrah da u MLA ka Mawkynrew, Bah Banteidor Lyngdoh uba dei ruh u Myntri ka tnad kam rep ka Sorkar Jylla.
Kane ka projek ka dei ka jaka pynlang um ba la shna kyrpang bad dang trei mynta ha ka jaka ba kynjang na kaba lah da kaba suk ban pynpoi ïa ka um sha ki dong bad jaka rep katei ka shnong bad kaba lah ban ngiam haduh shi lak litre ka um.
U Bah Banteidor, hadien ka jingjurip ha ka 21 tarik u Naitung, 2022, u la pyntip ba kane ka jaka pynlang um la tei ha ka mang tyngka kaba long 25 lak na ka skhim jong ka tnad kam rep bad bynrap ba ïa um yn pynbiang da ka jingïatreilang bad ka tnad PHE.
Da kaba pynpaw ba kane ka jaka pynlang um yn shna ha ka kata rukom ba ka um slap ruh yn ïoh ban pynlang, u la ong ba ka um na kane ka jaka ym tang ba kan pynmyntoi ïa ki nongrep hynrei kan dei ruh na ka bynta ka ïew kaba dang khreh ban shna mynta ha kane ka shnong.
U Bah L Kharumnuid, Sordar ka Shnong u la pynpaw ka jingai khublei ïa u MLA uba la pynsngap ïa ka jingud ki nongshong shnong namar ka jingshitom ban pynpoi ïa ka um sha ki jaka rep jong ki.
Ha shwa kane ka jingjurip, u Bah Banteidor Lyngdoh u la wan ruh ban plie ïa ka kamra klas jong ka RCLP School, Maw u Sam ïa kaba la shna ha ka mang tyngka ba 3 lak jong ka Special Rural Work Program.
Ha kane ka jingplie kamra klas la ïa donlang da ki nongïalam shnong ka shnong Maw u Sam, ki bor pynïaid skul, ki nonghikai ki khynnah skul lem ki riewrangbah ka thaiñ Mawkynrew.
