Nongstoiñ, Naitung 05: Ki nongrep ka West Khasi Hills ki dap satang ka jinglyngngoh namar ba u riewhadem ba ki la dep thung shitom naduh ki bnai ba la dep, hynrei mynta la bam lut ploiñ da u khñiang.
U nongthoh khubor hadien ka jingïoh jingtip bad leit jurip kylleng ki jaka, la lap ba kiba bun na ki nongrep ki la hap ban shu bret ïa u Riewhadem u ba ki la thung shitom, namar ka jingwan lynshop kyndit kynsan da u khñiang u ba la bam lut ïa u Riewhadem.
Haba pyrshang ban lum jingtip kaba kham bniah Nongdom Umyiap, ki nongrep ki la pyni ba u jait khñiang u ba khyllah u la bam lut ïa u Riewhadem baroh kawei ka kper, kat haduh ba ym shym la ïoh kheit ruh wat tang uwei u Riewhadem na baroh kawei ka kper.
Kum kitei ki khñiang ki la trei borbah bad bam lut khait ïa ki jaka thung riewhadem ha ka shnong Siejlieh Nongstoiñ bad ha ki katto katne tylli ki shnong kiba ha ka thaiñ Nongstoiñ bad ha ka West Khasi Hills District hi baroh kawei.
Ka kong Lantina Wahlang na ka shnong Nongdom, Umyiap Nongstoiñ, ka la ïathuh ba ka la lap ïa kine ki jait khñiang naduh kine ki khyndiat taiew ba la dep. Ka la ong ba haba ka pyrshang ban pied ïa ki katto katne tylli ki Riewhadem ban pynshisha ïa ka jingshah bam khñiang, ka la ïohi ba kitei ki khñiang ki don hapoh u Riewhadem bad ki don ïa ka dur kaba ïasyriem kum ki Larva ne ki Ñiangpar.
Ka kong Lantina Wahlang ka la ïathuh ba kane ka jingjia shah bam khñiang u Riewhadem, ka la pynlong ka jingduhnong kaba khraw ïa ki kum nongrep ka thaiñ mynta u snem. Namar kim shym la ïoh ban bam wat tang uwei ruh u Riewhadem haba ym shym la ïoh lad ban soh, hynrei la shu ïeng rynjaiñ tang u dieng u ba da I plung bha, katba hapoh la don tang ki khñiang man la u dieng Riewhadem. Hynrei, ha katei ka shnong Nongdom la ïohi pat ba u Sohbrap u la longbha bad u la man bha mynta u snem.
Halor kane ka jingjia shah bam khñiang jong ki Riewhadem, na ka liang ki nongrep ki la kyntu ïa ka tnad ba dei peit ïa ka rep ka riang ba kin pynlong ïa ka jingwad bniah bad ban thaw ki lad ki lynti ban ïada na ka jingbam duh ha kine ki jait khñiang, khnang ba kan ym long ka jingduh lehnohei lut na ka jingtrei shitom jong ki.
