Pynrem jur ka JNC ïa ki runar ba pynïap ïa u bah Kyrshan Lamurong

Khliehriat naitung 5: Ka Jaiñtia National Council (JNC), Publicity Cell, CEC ka pynrem jur ïa ki runar kiba pyniap ïa u bah Kyrshan Lamurong “ka dei ka jingïap ba sngewsih ba kane kam dei shuh tang ka kam runar hynrei ka dei ruh ka jingmaham kaba jur ïa ka imlang sahlang jong ngi ba ym dei shuh ban shim sting khamtam ïa ka jingshngaiñ jong ki briew jong ngi” ong u kyrwoh.
“Ka jingduh noh ïa kawei ka jingim ha kaba kum kane ka rukom kaba sngewsih ka la wanrah ïa ka jingsngewsih bad jingbitar kaba jur ïa ka seng bad ka JNC ka ieng skhem ryngkat bad phah ruh kane ka khubor sngewlem sha ka ïing ka sem jong u (L) Kyrshan Lamurong kiba la duh noh ia u”
“Ka jingjia ka la pynpaw sa shisien ïa ka jingma kaba khraw kaba la wanrah da ka jingleit jingwan khlem aiñ, ka jingbym tip ïa ka jaka sah bad ka jingbym don ka jingpeitngor kaba biang ha kiba bun ki shnong ïa ki briew kiba wan naba, ngi la ju kyntu bunsien ïa ki Dorbar bad ki khlieh nongsynshar, ki bor synshar shnong, bad ki bor shnong ba kin long kiba husiar ban da pynshisha ïa ki nongwan thymmai bad ban pynthikna ba ym don mano mano ba sah ne trei ha shnong khlem da pyntip bha sha ki shnong bad ki jaka treikam jong ka shnong. Kane ka dei ka kam kaba iadei bad ka jingshngaiñ jong ki paidbah bad dei ban leh ïa ka da kaba shim khia bha” la bynrap shuh shuh ka JNC.
“Ka jingiap jong u bah Kyrshan ka pynpaw ïa ka jingduna, kaba ma ha ka jingshngaiñ ha ka thaiñ bad ka jingpeit bniah ïa ka imlang sahlang ha kaba ki briew ki bym tip bad ki bym lah ban pynshisha ki ioh ban im bad iaid laitluid ha ki shnong jong ngi. Ki jingmaham bad ki jingkyrpad ban husiar bunsien la iehnoh bad la kyntait ruh bad ka por jong ki jingpynkynmaw kiba jem ka la kut noh.
Mynta, ka JNC kan ai bor ïa baroh ki unit, ki Circle, bad ki Zone jong ka ban sdang ïa ki kam katkum ka aiñ ha kylleng ka ri Jaiñtia ban khynra naphang ïa uwei pa uwei u briew u bym dei u riewlum uba sah ha ki jaka jong ngi, lada u dei mano mano. Ngin nym shongthait katba ki khlieh shnong bad ki tnad treikam ki shim sting ban iada na ki jingjia ba sngewsih, ki nongialam shnong bad ki dorbar shnong ki dei ban iatreilang pura bad kane ka kamba iadei bad ka jingshngaiñ. Kane ka dei ka jingbthah na ka JNC CEC – sdang mynta, bad wat iehnoh iano iano khlem da peit bniah”
” Ai ba kane kan long ka jingmaham kaba shai ïa baroh, lada ki briew jong ngi ki dang iai bteng ban shah pynmynsaw namar ka jingpeitngor kaba lyngkot haki shnong ki thaw ne ka jingbym don ki jingpeitngor, ka JNC kan pynjur ïa ka kam khynra da kaba skhem bad khlem jingartatien, ki nongshong shnong, ki nongsynshar shnong, ki dorbar shnong, ki seng samla bad ki jaka treikam ba marjan ki dei ban pynkhlaiñ mardor ïa ka jingpeitngor ha baroh ki jaka rung bad hapoh ki shnong, buh jingthoh ia ki jingwan, pynshisha ïa ka kam bad jaka sah, bad pyntip ruh sha ki unit jong ka JNC bad ki bor pynjari aiñ lada donkam.Kane ka dei ka jingïada ïalade iaka imlang sahlang”.
Ka seng ka dawa ruh ba ki pulit ki dei ban pynlong ïa ka jingtohkit kaba stet, kaba khlem shah liang bad kaba khuid bad ban pynthikna ba baroh kiba donkti ha kane ka kam runar kin shah pynngat ha ki kyndon aiñ kiba pura. Na ka liang ka JNC kan buddien bha ïa ka jingtohkit bad ka khmih lynti ïa ki jingpynbna paidbah man ka por na ki bor pyniaid haduh ban da ioh ïa ka hok kaba pura, pynkut u kyrwoh na ka JNC.