Shillong, Naitung 05: Ka Meghalaya Energy Corporation Limited (MeECL) ka la phaikhmat ban pynkylla ïa ka rukom pynmih bording hadien ba ka jinghap slap ha u bnai Jylliew ka la duna bha ïa kaba la khmih lynti. Kum shi bynta jong kane, ka jylla kan shaniah kham bun ha ka bording ba pynmih na ki thermal power bad solar power ban pynthikna ba ka jingsam bording kan ïaid beit.
Haba kren bad ki lad pathai khubor, u Commissioner & Secretary ba peit ïa ka tnad Power, u Sanjay Goyal, u la ong ba watla ka jinghap slap ka duna, hynrei ka jylla ka la pynkhreh pura ban pynbiang ïa ka bording elektrik ha ki bnai Naitung bad Nailar.
“Ka jinghap slap mynta u snem ka la duna ïa kaba la khmih lynti, bad kane ka long katkum ka jingpynshisha jong ka India Meteorological Department (IMD). U bnai Jylliew, uba ju long u bnai ba jur slap, mynta u snem u la don ka jingduna slap bha,” ong u Goyal.
Shuh shuh u la ong ba ka MeECL ka la pynkylla noh ïa ka rukom treikam jong ka ban ïakhun ïa kane ka jingduna slap.
“Namar ka jingduna slap, ngi la pynbeit thymmai ïa ka jingthmu ban pynmih bording. Ngi la sdang ban pyndonkam pura ïa ki jingïasoi bynta ba slem ban shim bording na ki thermal power station bad ngi la pynbun ruh ïa ka jingthied bording na ki solar power generator,” u la ong.
U la batai ba ka jingduna slap ka la ktah jur ïa ka pung Umïam, kaba dei ka pdeng jong ka jingpynmih bording ha Meghalaya.
“Ha ka thain Umïam, ka jinghap slap ka la duna bha. Ka um kaba ngi khmih lynti ba kan rung ha u bnai Jylliew kam shym la poi kumba la antad, kumta ngi la hap ban pynkylla ïa ka jingthmu jong ngi,” u la ong.
Kane ka la pynlong ïa ka Umïam Stage-I, kaba ju lah ban pynmih haduh 36 megawatt ha kane ka por jong u snem, ba kan treikam hapoh ka bor ba ju lah. Ka jingduna ka um ka la ktah ruh ïa kiwei pat ki bynta pynmih bording kiba don shapoh, kynthup ïa ka Umïam Stage-II, Stage-III, Stage-IV bad ka New Umtru Hydroelectric Project.
Watla ka jingpynmih bording na ka um ka la hiar, hynrei u Goyal u la pynthikna ba kan ym don kano kano ka jingduna bording ha ka jylla.
“Ka jinglong jingman jong ngi ka dang biang bha. Ngi la dep ban pynkhreh ïa ka bording kaba donkam na ka bynta ki bnai Naitung bad Nailar da kaba pynbeit ïa ka jingpynmih bording jong ngi bad da kaba thied bording na shabar ka jylla lyngba ki jingïateh bad ki agency bapher bapher,” u la ong.
U la pynthikna ruh ba ym don satia ka jingthmu ban pynlip bording (load shedding) ha ka jylla.
“Ngam ïohi ba kan don kano kano ka jingduna ha ka jingïoh bording. Ka jingkylla ka dei tang ha ka jingïapynïasoh jong ki jingïoh bording, kata ka bording na ka um, thermal, lyer bad solar. Namar ka jingduna slap, ngi la shaniah kham bun ha ka thermal bad solar power,” u la bynrap.
