Pyrshah ka SRKBUH ïa ka Land Bill ka VPP ha KHADC ka pyntlot bor ïa ki Raid bad Hima

Shillong, Naitung 5 : Ka jingïalang jong ka Synjuk Ki Rangbah Kur Ka Bri U Hynñiewtrep la pynlong ha ka 4 Naitung 2026, ha Mawkyrwat ban pynshai bad ïa tai ïa ki artylli ki mat ki ba ktah tyngeh ïa ki paidbynriew Khasi, kata ha kaba pynneh ïa ki riti dustur tynrai halor ka ba kheiñkur kheiñkha sha ka kmie, bad ki kynrum kynram na ka ba thmu ban taijlih ïa ka KHAD (Regulation and Administration of Land) (Amendment) Bill, 2026. hadien ba la ïa tai bniah da ki rangbah ka kynhun ka la kdew ïa ka jingsngewkhia halor ki kyndon ki ba thmu ban sloit ïa ka iktiar jong ki Dorbar Shnong, Dorbar Raij, and Dorbar Hima.
La pynkynmaw ruh ba kita ki shlem synshar katkum ki riti dustur tynrai ki dei ki lad ïada ïa ki riti dustur katkum ba la shon shab ha ka Khyrnit Bahynriew jong ka Riti Synshar Ka Ri India. Ki rangbahkur bad rangbah shnong ki la bynñiaw ïa ka jingleh laplah jong ka Dorbar Thawaiñ Dalariti Rilum Khasi (KHADC) ha ka ba mushlia ïa ki aiñ tynrai jong ka khlem da pynshong nia katkum ki nongrim jong ka synshar paidbah bashisha.
Ka jingïalang ka la kubur ïa ka jingpyrshang ban adkar ha ka rukom khaïi khyndew hapoh u pud ba la buhti katkum ka aiñ bad ka ba pynsuk ïa ka rukom korbar ïa ka khyndew da ki buit treikam ka juk ka ba pynryntih bad pynsuk ïa ki paidbah, hynrei la kynthoh jur pat ïa kaba len ïa ka synñiang bakhraw jong ki Dorbar Shnong, Dorbar Raij bad Dorbar Hima ha ka ba korbar ïa ka khyndew hapoh u pud u sam jong ka Dorbar Thawaiñ Dalariti. Ki rangbah kiba la kren halor kane ka phang ki la kdew ba kano kano ka jingpyrshang ban kylla ïa ka aiñ da kaba taijlih ka dei ban long ha ka nongrim jong ka Khyrnit Bahynriew khang ban ym jyrwit jyrwat ka synshar paidbah katkum ki riti tynrai ba naduh hyndai hynthai ka ba la neh pateng la pateng bad ba ka long ka ba biang na ka bynta ki paidbah.
Kiba la shim bynta ha ka jingkren pynshai shaphang ka aiñ bad ki riti dustur tynrai ki long u Bah Robert June Kharjahrin, Nongsaidaiñ, Bah Manstudy Nongrem, Khliehduh barim jong ka Dorbar Thawaiñ Dalariti (CEM, KHADC), Bah R. L. Kharpran, Khlieh Rangbah ka Synjuk Ki Rangbah Kur Ka Bri U Hynñiewtrep, bad Bah R. L. Blah, Saiñpyniar ka Synjuk Ki Nongsynshar Shnong. Hadien ba la ïakren sani da baroh ki rangbah bad ba la shim bynta da ki rangbahkur bad ki khlieh synshar shnong la rai ban kyrshan ïa ka jingpyrshang ban lam lynti da ki artylli ki kynhun, ka Synjuk Ki Rangbah Kur Ka Bri U Hynñiewtrep bad ka Synjuk Ki Nongsynshar Shnong.
Khnang ban nang tur shaphrang ha ka jingïakhun ban pynneh ïa ki riti dustur tynrai, la pynkhreh da ka jingïalang jong ki rangbahkur bad ki khlieh nongsynshar shnong ha ka 7tarik Naitung 2026 ha nongbah Shillong. Ka jingthmu ba kongsan ka long thik ha kaba pynneh ïa ka riti dustur kheiñkur kheiñkha na ka kmie bad ka ba pynneh ïa ka iktiar jong ki Dorbar Shnong, Dorbar Raij bad Dorbar Hima ki ba hap hapoh ka jingkhmih jong ka Dorbar Thawaiñ Dalariti, khnang ba kito ki ba bat ïa ka iktiar aiñ kin ym khynra bad mushlia ïa kaei ka ba la seng da ki longshwa manshwa bad ka ba la pynskhem da ki aiñ ba pura ha ka shlem ka ba la kyrshan pynskhem da ka riti synshar ha ka Ri India.