La ïaid shakhmat ki jingpynkhreh ban pynkylla ïa ki rukom treikam ka GHADC bad JHADC

Shillong, Naitung 1 : U Myntri Rangbah ka Jylla Conrad K Sangma ha ka sngi Ba-ar ula ong ba ki jingpynkhreh ban wanrah jingpynkylla ïa ka rukom treikam ha Garo Hills Autonomous District Council (GHADC) bad ka Jaintia Hills Autonomous District Council (JHADC) ki la ïaid shakhmat bad la khmih lynti ba ka Service Rules jong ki tnad yn ïaleh ban pyndep hapoh ka 1 tarik u Nailur bad la pynwandur ruh ïa ka rukom treikam lyngba ka Online System kaba thymmai ban pynkhlaiñ ïa ka rukom lum ïa ka khajna.
Kine ki artylli ki Council kham mynshwa ki la pdiang ïa ka jingtyrwa ka sorkar jylla ban ai jingkyrshan pisa da kaba bujli ha ka ban wanrah ïa ki jingkylla ha kaba ïadei bad ki kam synshar bad ki jingkylla ha ka jingpynlut pynsep, ong u Sangma.
“Ngi la don ïa ka jingïalang bad ka GHADC bad JHADC, kiba dei artylli ki district council kiba la pdiang ïa ka jingtyrwa jong ka Sorkar Meghalaya ban ïatreilang bad ka Sorkar Meghalaya ba kan kyrshan ïa ki” la ong u Sangma haba ïakren bad ki nongthoh khubor.
“Kane ka long ha ka rukom ba ngin ai lypa ïa ka pisa na ka khajna kaba ki dei ban ïoh ban kyrshan ïa ka tulop ka jongki, ban pynkhuid ïa ki jingsiew kiba dang sahteng katkum ka jingdon ka khajna. Kumta ka jingai lypa ïa ka pisa bad ki pat kin pdiang ïa ki jingwanrah ïa ki jingkylla khamtam eh ha ka rukom pynïaid ïa ki kam ki jam bad ka jingpynlut pynsep ïa ka pisa, khnang ba ngin lah ban kyntiew ha baroh ki liang ïa ka rukom treikam jong ki Council,” ula ong bad pynshai, kine ki jingkylla kin ym ktah pat ia ki mat kiba ïadei bad ki riti ki dustur bad kolshor.
“Khlem da ngam jylliew ha ki bynta ki bapher bapher jong ka riti dustur, kolshor bad kiwei kiwei ki bynta kiba long kyrpang jong ki District Council, khlem da ka tuklar ïa kitei ki bynta” ula bynrap bad ka ong, ba ha ka Lah Sngi U Blei ula lum ïa ka jingïalang bad kitei baroh artylli ki District Council kiba ïatreilang bad ka kynhun jong ka tnad pla tyngka jong ka jylla.
“Nga dap da ka jingkmen ba baroh artylli ki district council ki ïatreilang bad ka kynhun pla tyngka ka jong ngi. La ka dei ka service rules, jan kumba 18 tylli ki service rules ha man la ki district council ki dei kiba la sdang ban ïaid shakhmat” ula ong.
“Ngi khmih lynti ba ha ka 1 tarik u Nailur, ki service rules ïa baroh ki tnad naka bynta kitei ki artylli ki district council, kin long kiba la pynkhreh ban pyntreikam” ong u Sangma.
Ula ong ba ki service rules ki long kiba kongsan tam, namar ba ki shim khia ha kaba ïadei bad ka jingthungkam, ka jingkyntiew kyrdan bad kiwei kiwei ki bynta jong ka Tnad Personnel’.
U Myntri Rangbah ula ong, ba ka jingtreikam da ka Online kaba la sdang ban pynwandur ban pynlong ïa ka jinglum khajna kaba paka bad ban pynduna ïa ka jingsiew da ka lut tyngka. Nuksa, ha Garo Hills, ka jingpynthymmai ïa ki Patta, kaba jia man la ka 10 snem, ki dang treikam ban pynlong ïa kane ka jingpynthymmai da ka Online, khnang ba ka jinglum kan long kaba ryntih bad kaba treikam bha. Ka jingsiew kan long da ka Online lyngba ki Bank Account, kumta kan duna bha ka jingsiew da ki lut tyngka” ula ong bad ka ïathuh ba ïa kum katei ka rynsan yn dang thaw ruh na ka bynta ka jingsiew ïa ka Professional Tax bad Trading Licence.
“ïa kitei baroh lah dep ban ithuh bad la ïa trei ïa ka kam da ka jingïatreilang bad ki District Council, ïa kaba ngi khmih lynti ba yn lah ban pynbeit ryntih ïa baroh ka rukom pynïaid kam pynïaid jam, ka rukom trei bad ka jingbit jingbiang ha ka pisa pilaiñ jong ki Council,” ong u Sangma.
Ula ong ba ka sorkar ka dang wad ruh ïa ki lad ki lynti ban kyntiew ïa ka jinglum khajna jong ki Council. “Ngi dang peit ha ki bynta kumno ban pynbha ïa ka jinglum khajna jong ki Council, namar ba ngi lah khmih ha kiba bun ki bynta, la ka dei ka jingpynbeit ryntih ïa ka dor, la ka dei ha ka jingpyndonkam lut ïa baroh ki jingdon jingem kaba ki don, baroh kitei ki dei kiba long kongsan bha” ula ong.
U Sangma ula pynpaw biang, baroh kitei ki jingwanrah ïa ki jingkylla ki dei kiba la ïaid shakhmat da ka jingmynjur jong ki District Council.
“Khlem da tuklar ïa ka rukom treikam kaba man la ka sngi ka jongki ne ha kiwei kiwei ki bynta, hynrei ban btin bad ïalam lynti ïa ki ha kaba ïadei bad jingpynlut pynsep ïa ka pisa da ka jingai mynjur ka jongki hi” ula ong.
“Ngi kyrmen skhem ba kine ki sienjam, kine ki jingwanrah ïa ki jingpynkylla ha ka rukom pyntreikam da ka Online Portal, da kaba thaw ïa ki rukom treikam Online bad ka jingpyndonkam ïa ki kor Computer, kan ïarap ha kaban kyntiew ïa ka rukom treikam jong ki Council bad ban ïalam ha ka ban wanrah ïa ki jingkylla ha ki snem ki ban wan” ula bynrap.