Dawa ka Synjuk ki Nongdie Jain Khasi Market ban kyntiew kyrdan sha ka ïew ba shngaiñ

Shillong, Naitung 1: Ki dkhot jong ka Synjuk ki nongdie jain Khasi Market kila kyrpad ia u Myntri Rangbah ka jylla u Conrad K Sangma ban kyntiew kyrdan noh ïa ka Khasi Market sha ka iew kaba shngain kaba khuid ba suba bad ruh ban pynshna ia ki jingdonkam ha katei ka iew.
Kane kala wan hadien ba u Myntri Rangbah u Conrad K Sangma u la khot ïa kren ia ki ha State Guest Huose, Taraghar kaba la ialam da ka President bad Secretary ka Synjuk ha ka jingsynran lang u nongai buit jong ka synjuk.
Haba kren sha ki lad pathai khubor ka Kong Lary Rani kaba dei ka Secretary jong ka Synjuk kala ong ba u Myntri Rangbah u khlem ai kano kano ka jingkular ha khmat ka synjuk, hynrei ki sngewdon ka jingkyrmen lyngba ka jingkren halor ka entry bad emergency exit bad ka jingdonkam jong baroh ki dukan.
Ha kane ka jingiakynduh na ka liang ka synjuk kala ioh ruh ban aiti da ka dorkhas kaba la thoh bniah ia baroh ki jingdonkam jong katei ka iew kaba don 86 ngut ki nong shong dukan ba die jain ha Khasi Market.
Ïa mynta mynta na ka liang u Myntri Rangbah u khlem lah ban ai ka jingkular ban pyndep noh ne ban kan long noh hynrei u la ong ba un sa shim ïa ka jingkit khlieh kaba donkam eh bad ruh ban khot ïa ki nongpeit ka smart city bad kumjuh ruh na ka liang ka ophis jong u, ong ka kong Rani.
Shuh shuh ka kong Rani kala pyntip ruh ba ki la pynsngew sha u CM ba ïa ki dukan kidei ban ai kumba ki shong mynshwa hapoh parking lot Jaiaw namar ka jaka ba shong mynta ka long beit tang shipor bad ka ophis kan tip bha ban ai ïa ka size jong ka dukan.
Na ka liang jong ka President kala pynpaw ba ka jaka ba ki shong mynta dang kham lah ka jaka ha stand Jaiaw namar ba ka long pdeng bad ki briew kiba wan iew ruh ki suk hynrei ha stand Bhoi pat ka long tang shipor.
Katkum kaba ngi ïaid lyngba kane ka kynti ba mynta kadei ka jingjngai jong ka lynti ïaid bad kam ïahap lynti shuh hynrei ka die ka thied te ka don beit.
“Ha ka por ba dang shong ha Motphrang naduh 7 baje mynstep ngi la sdang shong dukan bad haduh 8 baje mynmiet ruh ngi dang shong hynrei ha stand Bhoi ka por bap lie dukan kadei haduh 11 baje ne 12 baje mynsngi bad ka pork hang kadei 5 ne 6 baje janmiet” ong ka kong Rani.