SHILLONG, Naitung 01: Lai tylli ki klob jong ka jylla Meghalaya, ka Shillong Lajong FC, ka Nongkseh SSCC bad ka Langsning FC ki la shah kynthup lang ha kajuh ka Group na ka bynta ka lympung ïalehkai Durand Cup 2026, ha ryngkat kawei ka klob na Maharashtra, kata ka Mumbay FC.
Baroh ki don 24 tylli ki kynhun, kynthup ïa ki hynñiew tylli kiba thymmai, ki ban ïashim bynta ha kane ka sienjam kaba 135 jong ka Durand Cup kaba la khreh ban long ha kylleng ki san tylli ki nongbah ban sdang naduh ka 25 tarik u Naitung haduh ka 23 tarik u Nailar.
Kane ka lympung kan sdang na Kolkata shuwa ba ki jingïakhun ha Ranchi, Imphal, Guwahati, bad Shillong kin ïaid shakhmat.
Ka nongbah Kolkata sa shisien kan long kum ka jaka pdeng jong kane ka lympung, ha kaba kan pynlong ïa ki jingïalehkai jong ar tylli ki Group, ka jingïalehkai kaba sdang, ar tylli ki quarterfinal, kawei ka semifinal bad ka phainal ha kylleng ka Vivekananda Yuba Bharati Krirangan bad Kishore Bharati Krirangan.
Ki kynhun ban ïakhun ha kane ka nongbah ki kynthup ïa ka Mohun Bagan Super Giant kaba la jop 17 sien, ka East Bengal FC kaba la jop 16 sien, ka Mohammedan SC, South United FC, CISF, ka Indian Army, ka Baghpat FC bad Samaleswari Sporting.
Ka Ranchi kan mih ha ka sien ba nyngkong kum ka nongpdiang, ha kaba ka Birsa Munda Stadium kan pynlong ïa ki jingïalehkai league naduh ka 26 tarik u Naitung haduh ka 16 tarik u Nailar bad sa kawei ka Quarterfinal. Kane ka nongbah kan pdiang ïa ka Jamshedpur FC, ka Sporting Club Delhi, ka Indian Air Force bad ka Defenders FC jong ka Sri Lanka Armed Forces.
Ka Khuman Lampak Stadium ha Imphal kan sdang ïa ki jingïalehkai naduh ka 28 tarik Naitung haduh ka 17 tarik Nailar bad kawei ka Quarterfinal. Kane ka nongbah kan pdiang ïa ka TRAU FC bad ka NEROCA FC, ka Indian Navy Football Team bad ka FC Raengdai, kaba wan ba-ar ha ka I-League 3 ha ka samoi ba ladep.
Ka nongbah Shillong kan pynlong ïa ki jingïalehkai ha Jawaharlal Nehru Stadium bad kan sdang naduh ka 31 tarik Naitung haduh ka 20 tarik Nailar bad kawei ka semifinal. Kumba la kdew ki kynhun ki kynthup ïa ka Shillong Lajong FC, Nongkseh, Langsning FCbad ka Mumbay FC.
Ha Guwahati, ka lahduh ba bat ïa ka burom kata ka NorthEast United FC kan lamkhmat ïa ka Group, ryngkat ka FC1 (kaba na J&K bad Ladakh), ka Bodoland FC bad ka Karbi Anglong Morning Star FC. Ki jingïalehkai kin long ha Indira Gandhi Athletic Stadium naduh ka 01 tarik haduh 13 tarik Nailar.
ïa ki saw tylli ki jingïakhun Quarterfinal yn pynlong ha Kolkata, Ranchi, bad Shillong, katba ka Shillong bad Kolkata kin pynlong mar kawei ka semifinal shuwa ba kane ka lympung kan kut noh da ka phainal ha Kolkata ha ka 23 tarik u Nailar.
