Ki bor pynïaid Distrik ki dei ban leh da kaba tyngeh ïa ki nongpynïaid ka Muharram: KSU

Shillong, Jylliew 30: Da kaba kynnoh ba ki don ki jingpynkhein ïa ki hukum jong ki bor pyniaid District bad ka jingpynthut ïa ki paidbah, ka Khasi Students’ Union (KSU) Laban Circle ka la thoh sha u Deputy Commissioner jong ka East Khasi Hills ban phah leh eiei pyrshah ïa ki nongpyniaid jong ka proseshon Muharram kaba la long ha Laban ha ka taiew ba la dep.
Ha ka shithi jong ka ha ka sngi Ba-ar, ka union ka la ong ba ka “pynpaw ïa ka jingsngewkhia ha kaba ïadei bad ki jingujor ba la ïoh pyrshah ïa ka jingïaid proseshon Muharram kaba la long ha Laban ha ka 26 tarik u Jylliew, 2026 (sngi Thohdieng.”
“La ïathuh ba katei ka jingïaid proseshon ka la pynthut ïa ka shongsuk shongsaiñ jong ka thaiñ, ka la pynthut ïa ka jingïaid ki kali, bad ka la wanrah ruh ïa ka jingbym shngaiñ ïa ki nongleit nongwan,” ong u President ka KSU Laban Circle u Bah Jason Laloo bad u General Secretary u Bah Shining Star Chyne ha ka shithi.
Katkum ka KSU, la pynlong ïa ki jingïaid proseshon ha ka 25 tarik u Jylliew na Red Cross, Laban sha ki thaiñ St. John, Lower Lumparing bad ha ka 26 tarik u Jylliew la sdang biang na Red Cross, Laban sha ka lad Civil Hospital Junction lyngba ka Oxford Hill, KOR, Last Stop, bad Rhino Point, shwa ban wanphai biang sha Red Cross, Laban.
Ka Union ka la ong ba baroh ar ki dei ban kut noh ha ka por 9:30 PM “katkum ka hukum ba la pynmih da ka Ophis jong u Deputy Commissioner” hynrei “la bteng haduh ka por 11:00 mynmiet, da kaba pynkheiñ beit beit ïa ka hukum jong ki bor pynïaid District.”
Ka shithi ka ong ba ka union ka la ïoh pdiang ïa ki jingujor na ki samla pule ha Laban, KOR, bad Lower Lumparing “ha kaba ïadei bad ka jingtem bad jingrwai ba jam ha ki por ba la janmiet jong ka jingïaid proseshon, kaba la ktah jur ïa ka jingpynkhreh jong ki na ka bynta ka mid-term examinations.”
Ka KSU ka pynpaw ruh ba ki “jingshad ha surok kiba pyndonkam ïa ki waitlam bad ki jingpyni ïa ka ding” ha ka jingïaid proseshon ba la ïashim bynta da ki “spah ngut ki nongïashim bynta.”
Ka KSU ka la khot ïa kum kine “kiba shyrkhei haduh katta katta,” da kaba bynrap ba “ki khubor ki pyni ba ki nongleit nongwan ki la shah ngat ha ki phngit ding kiba her, kaba long ka mat kaba sngewkhia.”
Ka union ka la ong ba ka jingïaid proseshon “ka la pynthut shibun ïa ka jingïaid lynti jong ki kali, khamtam ha ki surok kiba rit jong ki Dorbar ba la kdew haneng,” bad ka la kam ba ka jingleh “ki kali ka la hap sangeh noh kumba man la ka 50 haduh 80 meter ban pyni ïa ki waitlam bad ki jingshad ding, kaba la wanrah ïa ki jingjingeh ha ka leit ka wan kynthup ïa ki jingshakri ba kyrkieh kum ki kali kit nongpang ha ka lynti surok bah.”
Katba ka pynskhem ba ka union ka burom ïa man la ki jait niam bad ïa ka hok jong uwei pa uwei u briew ban pynpaw bad pyntreikam ïa la ka jong ka jingngeit, ka KSU ka la pynpaw ba “kam lah ban shah ïa kano kano ka kam kaba ktah beit directly ne indirectly ïa ka jingsuk, jingkmen bad jingshngaiñ jong ki nongshong shnong baroh kawei.”
Ka unionka la kyntu ïa ki bor synshar district ba kin “shim ïa ki sienjam kiba dei tyngeh ïa ki nongpynïaid khnang ba kum kine ki jingeh kin ym jia biang ha ki por ban wan bad ba baroh ki jingïaid proseshon paidbah kin long kiba pyrkhing bha katkum ka aiñ bad ki kyndon ba la buh.”