Pyllait paidbah u Myntri Rangbah ïa ka prokram “Achievers of the Month”

Shillong, Jylliew 30: U Myntri Rangbah Conrad K Sangma mynta ka sngi ula pyllait paidbah ïa ka “Achievers of the Month” Programme, ka prokram flagship kaba thmu ban ai jingithuh ïa ki briew kiba treikam bha bad ban wanrah ïa ka dustur sengkam sengjam ha kylleng ka Jylla Meghalaya.
Ïa kane ka prokram la pynwandur ban ai ka rynsan ia ki nongjop na ki kam bapher bapher ba kin lah ban iasam jingtip ïa ki lynti iaid jong ki, ai mynsiem ïa kiwei, bad pyni pyrthei ïa ki jingmyntoi jong ki prokram ka Sorkar ha kaban wanrah ïa ka jingroi bad ki buit treikam thymmai.
Haba pyllait ïa ka prokram, u Myntri Rangbah ula pynpaw ba katba ka Sorkar ka shim ïa ka bynta ban long ka nongiarap da kaba wanrah ïa ki policy, ki jingtei bad ki rukom ai jingkyrshan, dei ka jingseng kam sengjam kaba pyntyllun ïa ka jingkiew ha ka ioh ka kot.
“Ka Sorkar ka thaw ïa ka nongrim, hynrei ka dei ka jingsengkam sengjam kaba pynlong ïa ka ioh ka kot ban kiew” ula ong, haba bynrap ba “ka jingsengkam sengjam ka dei ka nongrim jong ka jingpynmih ïa ki lad kamai kiba neh bad ka jingkiew ha ka ioh ka kot”.
Haba ban jur ïa ka thong ha lyndet kane ka prokram, ula pynpaw ba ka prokram ka thmu ban pynkut noh ïa ki prokram ba thmu tang ïa kawei ne ar ki kam bad ban wanrah ïa ki khana ka jingjop shakhmat eh. “Ngi kwah ban iasam ïa ki khana jingjop jong phi bad ka pyrthei.Kaei kaba lah ban long kaba suk eh ïa phi ka dei ka jingai mynsiem ïa kiwei pat” ula kynthoh.
U Myntri Rangbah ula pynbna ruh ba u bnai Naitung yn dei u bnai kyrpang jong ki nongsengkam sengkam, da kaba pynlong ïa bun ki jingiakren, ki rynsan ïathuh khana, bad ki prokram pynphriang paidbah lyngba ki social media kiba thmu ban pynpaw pyrthei ïa ki lynti ïaid jong ki.
Ha kane ka jingialang, ki nongsengkam sengjam bad ki nongjop kin ïasam khana halor ki jingshem jong ki, kin kren halor ki jingeh ba ki iakynduh, ki jingialeh bad ka jingkiew shaphrang.
Kila pynpaw ïa ka jingsngewnguh ïa u Myntri Rangbah namar ka jingpynlait ïa kane ka prokram kaba ai jingithuh ïa ka jingtrei shitom jong ki bad ai mynsiem ïa ki nongsengkam sengjam.
U Myntri Rangbah ula ai jingiaroh ruh ia ka bynta jong ka PRIME bad ka jingleit jong ka sha ki jaka nongkyndong ban wanrah jingkylla ha ka sengkam sengjam, iasam ïa ki nuksa jong ki briew kiba la kiew bha ha ki kam ba ki trei na ka jingsdang kaba rit ban poi sha ki iew jong ki jaka sor kiba heh.
Ka “Achievers of the Month’ Programme kan, ha ki bnai ban wan, pyni ïa ki nongjop na ki bynta bapher bapher kynthup ki kam ialehkai, ka rep ka riang, ka pule dangle, ka jingshakri paidbah, da ka thong ban tei ïa ka jingialeh (movement) ha ka Jylla baroh kawei ban ai mynsiem ban ai jingithuh.