Sdang ka MEMRIWU da ka jingteh lama ïong ha ki kali 108 bym pathiaw ka sorkar

Shillong, Jylliew 30: Namar ka jingmynthi bad kuman jong ka sorkar halor kaba ïadei bad ki mat jingdawa jong ka Meghalaya EMRI Workers Union (MEMRIWU), mynta ka sngi kila sdang ka jingiakhih ba jai jai da kaba teh lama iong ha baroh ki kali 108 ambulance.
Katkum ka kyrwoh khubor na u President ka MEMRIWU u Bah Roypar Kharraswai u la ong, Ngi la buh por ia ka sorkar kan long haduh ka 29 tarik u Jylliew katkum ka khubor ba ngi la pynlait sha ki lad pathai khubor kham mynshuwa, bad mynta ka jingïakhih kaba jai-jai jong ngi kan ïaid shakhmat naduh mynta ka sngi ka 30 tarik u Jylliew.
U Bah Kharraswai u la ong, Katkum ki jingpynlait khubor ba ngi la pynmih ha ka 3 tarik bad 11 tarik u Jylliew, ngi la thmu ban wad jingshai na ka Sorkar halor ka Regularisation ïa kane ka kam bad ban kyntu ïa ka sorkar ba baroh ki mat jingdawa bad ki jingeh ba dang sahteng ba ka sorkar kan pynbeit hapoh ka Ophis hi.
“Ngi la kyntu ruh ia ka Sorkar ban khot ïa ngi sha ka jingïakren, pynban haduh mynta ka sngi, ym pat don ba khot ne ai khubor eiei ïa ka Union sha ka miej jing ïakren” ong u Bah Kharraswai.
Shuh shuh u la ong, Namarkata ngi kwah ban pyntip paidbah ba ka por ba ngi la buh ïa ka sorkar kan long haduh ka 29 tarik u Jylliew bad mynta ka jingiakhih kaba jai-jai jong ngi kan iaid shakhmat naduh mynta ka sngi ka 30 tarik u Jylliew.
Halor ka bhah kaba nyngkong jong ka jingiakhih jong ngi, ngi teh/pyndait bad pyni da ki lama iong ha baroh ki kali 108 ambulance jong ngi ha baroh kawei ka Jylla khnang ba u paidbah un sngewthuh bad tip ïa ka daw bad kin ym klumar ne lyngngoh ynda ki la iohi ia kine ki lama iong.Kane ka long ka rukom pynpaw jong ngi ïa ka jingsngewkhia bad ka jingsngewlynga bad jingsngewsih halor ka jingsngap bad ka jingbymsuidn?iew ka Sorkar halor ki jingdawa ba shisha jong ngi, u la ong.
“Ngi kwah ruh ban pyntip ba lada ka Sorkar ka ïai kyntait ban sngap ïa ki jingeh jingud jong ngi bad lada kam sngap, ngim banse ban shim ka rai ban sdang da kiwei pat ki bhah iakhih kiba kham tyngeh bad kane kan ktah ïa ka service ha Jylla Meghalaya baroh kawei” u la ong.
Na ka liang ka MEMRIWU ngi pynpaw ka jingsngewsih shi katdei eh ïa ka jingeh dohnud ki myntri sorkar jong ngi khamtam eh u myntri ka koit ka khiah, halor ka jingdawa jong ngi ban pynbha noh ïa ka jingai shakri sha ki paitbah lyngba kane ka 108 service namar ka jingshakri ka la iaid 18 snem mynta hynrei ka jingbun ki 108 ambulance ki dang neh katjuh haduh mynta, u la ong.
U Bah Kharraswai u la ong, Kane ka jingshakri jong ka 108 ka la long ka jingmyntoi kaba khraw eh ia ki paitbah nong shong shnong ha ka pang ka shitom la katta snem da ki lak ngut khmtam sha ki thain nongkyndong, ki paitbah ki ap khmih lynti ban nang pyn bun shuh shuh ki kali 108, ban nang pynbun shuh shuh ki Nongtrei, ban nang pynbiang shuh shuh ki jingdonkam hapoh kane ka kali bad kumta ter ter, pynban ka long kaba sngewsih ban iohi ïa ka jingleh mynthi ka sorkar ha kaba iadei bad ka jingdawa jong ka Union ban kham pynbha shuh shuh ia ka 108 service ha kane ka bynta.
Ki jingdawa ka union ka long ban pynduh pyndam noh ïa ka jingaiwai sha ki company shimet namar ki Company kiba trei tang ban ioh kamai spah na kane ka Ri jong ngi, kan ktah ia ki nongtrei bad ka jingshakri jong kane ka kam baroh kawei.