Tuid ki paid riewngeit na ki 18 Parish sha Myndihati ban lehburom ïa ka Dohnud Bakhuid tam U Jisu

Jowai, Jylliew 30: Kumba ju long shisien shisnem ka jingleit ‘riewblei (Pilgrimage) bad ka jinglehburom ïa ka Dohnud bakhuid tam U Jisu nalor ba manla ka Parish ki don ka ïingmane kaba la ainam ha ka Dohnud Bakhuid tam U Jisu bad kum ka Diocese pat ïa kane ka ïingmane kaba la aiti bad ainam ha ka Dohnud bakhuid tam U Jisu ka dei ka Iingmane ka Balang shnong Myndihati kaba hapoh ka Parish Khliehriat, East Jaiñtia Hills District.
Ïa kane ka jingleit ‘riewblei ha ka Dohnud bakhuid tam U Jisu, ka Diocese Jowai ka la pynlong ha kane ka 28 tarik Jylliew 2026 ha kaba da ki hajar ngut ki paidriewngeit na ki 18 Parish jong ka Diocese ki la ïatuid sha Myndihati ban lehburom ïa ka Dohnud bakhuid tam U Jisu. Ha kane ka jingleit riewblei ki Parish kiba na West Jaiñtia Hills kum juh ki Parish ka East Jaiñtia Hills kum ka Ladrymbai, Ladlakadong, Sutnga bad Jalaphet ki ïa kynduhlang ha Don Bosco College bad sdang ka jingïaid proseshon haduh ban da poi top ha Myndihati ha kaba don ka ïingmane kaba la aiti kyntang bad ainam ha ka Dohnud bakhuid tam U Jisu bad ki Parish kum ka Umkiang, Lumshnong bad kiwei ki sdang ka jingïaid proseshon jong ki shwa ban poi ka shnong Myndihati.
Ha kane ka jingleit riewblei ki don ruh ki parabangeit kiba pynshitom ïalade da kaba shah jingit, kiar na ka bam ka sa bad da kaba ïaid kjat kum na ka Parish Yongshiwiat (West Jaiñtia Hills na par Mynkhen) kaba jngai tam spah Kilometer haduh Myndihati. Ha kane ka jingleit riewblei da ki spah ngut ki paidriewngeit ki pynthymmai ïala ka jingim mynsiem da kaba shim ïa ka Sakrament ka jingkylla ka bamut bad la ïoh ruh ïa ka sneng ka kraw kaba sngewtynnat bad ka Khanatang (Parom) shaphang ka Dohnud bakhuid tam U Jisu da u Phadar Rev.Fr. Richard Shylla, phadar synrop ka Parish Jowai.
Ha ka nohphai sngi shwa ban pynlong ïa ka jingkñia Mass bakhuid la pynlong ïa ka jingïaid proseshon na Sacred Heart Secondary School, Myndihati sha ïingmane da ki Nongrah Diengphna bad ka Band ki Samlalud (Kynthei) jong ka Sacred Heart Secondary School Myndihati bad ki sur tem batbit bad bashoh mynsiem kiba ïadei shaphang ka Dohnud bakhuid tam U Jisu ka la ktah bad pynlung mynsiem ïa kiba bun ki paidriewngeit
Ïa ka jingkñia Mass bakhuid bad ha baroh ki jinglehñiam la lamkhmat da u Most Rev. Ferdinand Dkhar dd, Bishop ka Jylla Niam Jowai ha ryngkat ka jingiasynran ki Lyngdohsohblei (Phadar) na ki Parish jong ka Diocese.
U Bishop Ferdinand haba kren ha kane ka sngi u la ai ka jingkren kaba sngewtynnat shaphang ka Dohnud bakhuid jong u Jisu ba ka long ka Dohnud kaba jemnud, kaba sngewrit, kaba ïaishah, kaba dap da jingmap ei kaba khlem buh kyndon bad kaba dap da ka jingisynei ïa ki briew baroh khamtam ïa kito kiba khot kyrpad ïa ka jingisynei jong u.
Ha kane ka sngi u Bishop Ferdinand Dkhar ula pynkupbor ruh ïa ki katto katne ngut ki Rangbah bad ki longkmie kum ki dkhot jong ka Family Commission jong ka Jowai Diocese.