Pynjlan ka Shillong Lajong FC ïa ka kontrak na bynta ki 8 ngut ki rangïalehkai ba kynsai

Shillong, Jylliew 30 : Ka Shillong Lajong Football Club (SLFC) ka la pynbna ba ka la pynjlan ïa ka kontrak ïalehkai bad ki phra ngut ki rangïalehkai ba kynsai na Meghalaya bad na ka thaiñ Shatei Lam Mihngi, da kaba pynskhem ïa ka thong jong ka klob ban kyntiew bad pynneh ïa ki sap ïalehkai kiba mih na la ka jong ka jylla.
Ki rangïalehkai kiba la pynjlan ïa la ki kontrak ki kynthup ïa u Phrangki Buam bad Everbrightson Sana Mylliempdah (Forward), Kenstar Kharshong bad Kitboklang Khyriem (Defender), Gladdy Nelcen Kharbuli, Tremiki Lamurong bad Abhay Gurung (Midfielder), lem u Siwel Rymbai (Goalkeeper).
Na kine, u Phrangki, Kenstar, Everbrightson, Gladdy bad Tremiki ki la soi ïa ka kontrak kaba thymmai na ka bynta lai snem, katba u Siwel, Kitboklang bad Abhay ki la pynjlan ïa la ka kontrak na bynta ar snem.
Ka Shillong Lajong ha ka kyrwoh ka la ong ba kane ka rai ka pynpaw ïa ka thong jong ka klob ban tei ïa ka kynhun kaba khlaiñ da ki rangïalehkai trai jylla kiba kit ïa ka jingïohi jngai, ka mynsiem jingïalehkai bad ka kolshor phutbol jong ka Meghalaya.
Ka klob ka la ong ruh ba kine ki rangïalehkai ki la pyni ïa ka jingaiti lut, ka jingkiew shaphrang bad ka sap kaba kyrpang, da kaba noh synniang shibun ïa ka kynhun ha madan bad shabar madan. Shuh shuh, ka la pynskhem ba kan dang bteng ban ai lad ïa ki samla na ka jylla bad ka thaiñ ba kin kiew ha ka jingïalehkai phutbol ha ka kyrdan kaba shalor.
Haba kren halor kane, u Managing Director ka Shillong Lajong, u Bah Larsing LD Sawyan, u la ong ba hynñiew ngut na kine ki phra ngut ki rangïalehkai ki dei kiba la mih na ka Lajong Academy Development Programme, kaba pyni ïa ka jingjop jong ka klob ha ka jingpynroi ïa ki samla.
U la ong ba ka jingpynjlan kontrak ka pyni ïa ka jingangnud jong ka Shillong Lajong ban pynthikna ïa ka jingïashim bynta kaba neh slem ha ka Indian Football League.
U Bah Ming u la pyntip ruh ba ar ngut ki rangïalehkai jong ka Shillong Lajong kin sa leit ban soi kontrak bad ki klob jong ka Indian Super League (ISL) ha une u snem. Watla katta, ka klob ka la pyrshang katba lah ban pynneh ïa kiba bun ki rangïalehkai jong ka kynhun bad ka sngewkmen ba u Captain bad u Vice-Captain ki la rai ban bteng bad ka klob.
U la bynrap ba ka Shillong Lajong ka dang pynkhreh ruh ban wanrah ïa ki rangïalehkai bathymmai ban pyndap ïa ka jaka jong kiba la mih noh, bad ïa kine yn sa pynbna shen.