Nongstoiñ, Jylliew 26: Ka Deputy Commissioner (Election) Eastern West Khasi Hills District, ka la pyntip paidbah ba katkum ka jingbthah na ka Election Commission jong ka ri India, kan don ka jingpynthymmai biang ïa ka thup Electoral Roll jong ka 30-Mairang (ST) bad 31-Mawthadraishan (ST) Assembly Constituencies bad ka jingpynrung kyrteng thymmai ïa baroh kito ki nongshong shnong kiba la kynjoh 18 snem ka karta haduh ka 01.10.2026.
Kan don ka jingleit rung sha man la ki thliew ïing da ki BLO ka ban sdang naduh ka 30 tarik Jylliew 2026 haduh ka 29 tarik Naitung 2026. Ka jingpynbeit ïa ki polling station kan long hapoh ka 29 tarik Naitung 2026, ka jingpynmih ïa ka Electoral Roll ba nyngkong kan long ha ka 5 tarik Nailar 2026,
Yn pdiang ïa kino kino ki jingujor ne jingdawa na ka bynta kito kiba la kum klet ban shim kyrteng ne iehnoh ïa ki kyrteng ha ka por ba pynkhreh ïa ki Electoral Roll ne bakla ha ka spel dak, lane ha ka snem bad kiwei kiwei ïa kaba la pynbeit ha ki tarik naduh ka 5 tarik August 2026 haduh ka 4 tarik September 2026.
Kan don ka jingbishar bad peit bniah lada don kino kino ki jingujor ne jingdawa ïa kaba la pynbeit ba kan long naduh ka 5 tarik Nailar 2026 haduh ka 3 tarik Risaw 2026 bad ka jingpynmih ïa ka Electoral Roll ba la dep pynbit pynbiang nadong shadong kan long ha ka 7 tarik Risaw 2026.
Ha ka por ka jingshim kyrteng da ki BLO ha man la ki thliew ïing, ka jingpynrung kyrteng kan long tang ïa kito kiba dei ki nong India, kiba long ki nongshong shnong hapoh ka Constituency.
Kumta la kyrpad ïa baroh ki nongshong shnong ba kin ïasnohktilang da kaba kin ai ïa baroh ki jingpynshisha ha ki BLO, khnang ba kin lah ban pynrung kyrteng ha ki form ba la pynkhreh khnang na ka bynta kane bad ba la soi kyrteng ïa ki da ki nongthep vote lane u khlieh jong ka ïing. Ki nongshong shnong ki lah ruh ban phah jingtip sha ka office ïa kino kino kiba ai ïa ki jingpyntip ki bym shisha bad yn shim rai ïa ki katkum ka aiñ.
Ïa ki Electoral Roll ba la dep pynkhreh, yn sa pyni paidbah da kaba wah ha office jong u Electoral Registration Officer bad ruh ha ki polling station. Kino kino kiba la biang pura ka karta, kiba dei ki nong India, lada ïa ka kyrteng jong ki ym shim la pynrung ha ka thup, ki lah ban buh ïa ki jingdawa lane lada don ka jingspel dak bakla ïa ka kyrteng ne ka snem kam ïadei lane lada don ka jingpynrung kyrteng ïa uno uno u briew u bym dei hok, ki lah ban buh ïa ka jing ujor jong ki ha ki tarik ba la kdew ha u Electoral Registration Officer. Ki paidbah ki lah ruh ban leh hi dalade da kaba pyndonkam ïa ka website http://voters.eci.gov.in/
Namarkata la kyrpad ïa ki seng saiñ pyrthei, ki nongïalam paidbah, ki riew pawkhmat jong ki shnong ki thaw, ki sordar shnong, ki dorbar shnong, ki sengbhalang ba kin ïa snohktilang ban pyntip ïa kino kino ki jingduna ba ki lah ban shim ha ki Electoral Roll bad ban phah ïa ki jingujor sha u Electoral Registration Officer ha ka por kaba biang na ka bynta ban leh ïa kaba donkam.
