Shillong, Naitung, 20: Ki nonghikai SSA kiba don hapoh ka shatri jong ka Meghalaya SSA School Assocation ha ka sngi Balang ki la takraiñ bad sangah tyngeh ïa u Myntri ka tnat Pule Puthi ka Sorkar Jylla u Bah Lahkmen Rymbui hadien ba u la byrngem byrsit ba ka Sorkar kan khate tulop ïa ki nonghikai skul SSA kiba ïashim bynta ha ka jingïakhih bad ban pynduh noh ïa ka jingïarap pisa (Grant) ïa ki School Managing Committee (SMC) ki bym leh eiei pyrshah ïa ki ki nonghikai.
Kane ka jingïakynthoh mar kylliang hapdeng ka MSSASA bad u Myntri ka tnat Pule Puthi u Bah Lahkmen Rymbui ka la long hadien ba ka jingïakhih jong ki nonghikai skul SSA ka la kynjoh sha ka sngi kaba lai.
“Wat pynbor ïa baroh ki nonghikai skul SSA ban resaiñ lut baroh na ka kam (mass resignation). Lada baroh 12541 hajar ngut ki nonghikai SSA ngin resaiñ nga thikna ba shi bynta ka pule puthi hapoh ka Jylla Meghalaya kan khyllem hi jraiñ,la ong u nongïalam jong ka MSSASA u Bah Aristotle Rymbai haba pynphai nia ïa u Bah Lahkmen Rymbui ha ka por jammiet sngi Balang.
“Wat pynbor ïa ngi ban shim da kane ka sienjam. Ngi wan hangne ban dawa ïa la ka hok,” u la bynrap.
“Ngi dawa ïa u Myntri ka tnat Pule Puthi ba u dei ban panmap halor ka jingkren jong u bad lada um panmap ngin khot ïa ka jingïalang lashai (sngi Palei) ban shim da ka rai kaba tyngeh,” la ong une u nongïalam ka MSSASA.
“Ka MSSASA ka kwah ban phah ïa u kyrwoh uba shai sha ka Sorkar Meghalaya Democratic Alliance bad sha u Myntri ka tnat Pule Puthi u Bah Lahkmen Rymbui ba ngi wan hangne ban ïakhih katkum ba la pynkup bor da ka riti synshar jong ka ri India. Ngi wan hangne ban ïakhih da kaba iehnoh ïa la ki khun ki kti ha ing namar da ki san bnai ngi khlem ïoh tulop, ka bam ka dih ngim lah ban pynbiang shuh ïa ki khun ki kti. Ha ka jaka ba un (Lahkmen Rymbui) sngap ïa ka jingud bad jingkyrpad ïa ka Sorkar ka wan pynban da ka jingbyrngem byrsit ïa ngi ki nonghikai SSA. Ka long kaba pyndiaw mynsiem ban ïohi ïa ka jingkren jong u ïa ka jingïakhih jong ngi,” la ong une u nongïalam jong ka MSSASA.
“Ngi kwah ban ong ïa u Myntri ka tnat Pule Puthi ba un peit ïa ka Article 1 (c) ka kren kumno katkum ka riti synshar jong ka ri India. Ka Article 19 1 (c) bad ka Article 21 ka kren kumno. Ngi don ka hok ban ïakhih pyrshah ïa ka Sorkar haba ka leh beiñ bad haba kam ai ïa ka hok kaba ngi dei ban ïoh,” la takraiñ u Bah Rymbai bad bynrap, “ngi don ka hok ba ngin ïakhih haba ka Sorkar ka pynduh ïa ka hok jong ka jinglongbriew manbriew jong ngi ym dei ngi shu wan leh tamasa ne ban ïa khawai dawai ha kane ka jaka. Ngi wan hangne da ka jingpang mynsiem, da ka jingsngewsih bad da ka jingkyrmen ba ka Sorkar kan sngap ïa ka jingeh ba ngi ïakynduh.”
Haba pynpaw ba ki nonghikai skul SSA ki la ïaishah la 5 bnai kynthih bad ka Sorkar, u Bah Rymbai u la ong, “katne ngi la ïai shah bad katne ngi la ïatreilang bad ka Sorkar ym ba ngi ïaleh pyrshah, ngi wan hangne ban dawa ïa ka hok. Balei ïa ngi ki nonghikai ym don hok shuh balei don hok tang ïa kitei ki lei san snem?”
Une u nongïalam ka MSSASA u la dawa ïa u Myntri ka tnat Pule Puthi ka Sorkar Jylla ban buh jingkylli ïa u Myntri Rangbah ka Jylla u Conrad Kongkal Sangma halor ka 44 klur kaba dei ban siew da ka Sorkar Jylla katkum ka Capping Norms ïa kaba ym pat shym la pyllait satia haduh mynta.
“Naduh u naduh u bnai Lber, haduh Naitung, u Bah Lahkmen u dei ban jubab lashai (ka sngi Palei) shano kane ka T. 44 klur ka don,” ong u Bah Rymbai.
“Ngim dei ban klet wat ïa ka bhah pisa kaba T. 104 klur kaba ki (Sorkar) bat kai na ka bynta ban siew tulop ïa ngi ki nonghikai SSA,” u la bynrap.
Une u nongïalam ka MSSASA u la kyrpad ïa ki kmie ki kpa jong ki khynnah skul bad ïa ki paidbah ban ai jingkyrshan lem ïa ki nonghikai skul SSA kiba pynlong ïa ka jingïakhih ban dawa ïa la ka jong ka hok.
Kum ban pyntip hangne, ki nonghikai skul SSA na rilum Garo ki la pynlong ïa ka jingïakhih da kaba ïaid paidbah ha sor Tura bad phah ruh ïa ka dorkhas sha u Myntri Rangbah ka Jylla lyngba ka ophis jong Deputy Commissioner, ka West Garo Hills District.
