Ïaid noh na ka surok Laitlyngkot – Mawïong – Umthli -Laitkynsew, bthah u ADC Pynursla ïa ki paidbah

Shillong, Jylliew 24 : Ka ophis treikam jong u Additional Deputy Commissioner Pynursla Civil Sub-Division, ka pyntip paidbah ba hadien ka jingtwa noh ka surok Shillong – Dawki haneng ka shnong Laitlyngkot dang shen, kumta la kyntu ïa ki paidbah nongleit nongwan lyngba katei ka surok ba kin pyndonkam noh shipor da ka surok Laitlyngkot -Iew Mawiong – Umthli – Nongthymmai bad mih pat sha Laitkynsew ban poi sha surokbah.
Shuh shuh la pyntip ba ha ka por mynsngi ka surok kan khang naduh ka por 10:00 baje mynstep haduh 4:00 baje janmiet. Katba ha ka por miet pat, ka surok kan khang naduh ka por 10:00 baje miet haduh 5:00 baje mynstep.
Shuh shuh la bthah ba na ka surok Laitlyngkot sha Pomlum kan dei tang na ka bynta ki kali rit bad ki kali pdeng. Hynrei naduh Pomlum sha Mawlich, yn shah ïa baroh ki kali ban ïaid, kynthup ïa ki kali rit, kali pdeng bad ki kali heh.
La pyntip ruh ba yn shah ïa baroh ki kali ban ïaid lyngba na baroh ar bynta, kata na Lyngkyrdem bad Laitlyngkot, haduh ka por 10:30 baje mynstep. Hadien kata, ka kompani kaba pyntrei kan sdang ïa ki kam shna surok ha katei ka bynta.
Shuh shuh la ong ba namar ka aïom slap ka la sdang, la kyntu jur ïa baroh ki nongleit nongwan bad paidbah ba kin long kiba husiar bha haba ïaid lyngba kane ka bynta jong ka surok bad ban kiar katba lah ïa ki jingleit bym donkam por ba jur u slap ne hadien ba la dep slap jur, khamtam eh ha ka por miet.
La pynbna ruh ba ki kali ba ai jingïarap kyrkieh kum ki Ambulance, Fire Service bad Police ki lah ban ïaid wat ha ka por ba khang ka surok, hynrei dei ban phone sha Pynursla Police Station ha u nombor 9862251116.
Kane ka long katkum ka jingpyntip lyngba uAdditional Deputy Commissioner, Pynursla Civil Sub-Division, Bah G Warjri, MCS.