Shillong, Jylliew 24: Ka Meghalaya ka la lah ban jam sa sha uwei u mawmer ha ka rukom sumar ïa ka jingpang klongsnam kat kum ka juk ba mynta da ka jingjop ha ka sien ba nyngkong ban leh ïa ka Transcatheter Aortic Valve Implantation (TAVI) ba pyndonkam ïa ka MYVAL Transcatheter Heart Valve System ba la pynmih da ka Meril Life Sciences.
ïa kane ka jingsumar la lah ban pyndep da kaba jop da u Dr Synrang Warjri, ryngkat bad doktor sumar klongsnam ba tbit ne heart specialist ka Dr Joy Shome kaba ïalam ha khmat, ha kaba la lah ruh ban wanrah ïa ka rukom sumar kaba bha tam na ka bynta ban sumar klongsnam.
Kane ka jingjop ka kdew ïa ka bynta ba kongsan jong ka jingkiew ka Meril Life Sciences ban nang kyntiew ïa ki buit thymmai ha ka liang ka jingsumar ba la sdang na la ka jong ka ri bad nang pynïar ïa ka jingsumar ïa ka jingpang klongsnam ha ka rukom ba bha tam ha kylleng ka ri India.
Ka jingjop ka pyni ïa ka sienjam ba kyrpang jong ka jingïaid sha khmat ha ka rukom ai jingsumar ka Meghalaya bad ka pyni ruh ïa ka jingkylla kaba khraw ha ka jingai jingsumar.
Ka TAVI kadei ka rukom sumar kaba donkam ban puid tang khyndiat na ka bynta ban sumar ïa kito ki nongpang kiba la jur bha ka jingpang aortic stenosis, kaba long ka jingpang kaba ap jingma ïa ka jingim kaba ktah ïa ki thied ne valve jong u klongsnam.
Da ka rukom sumar kaba ju leh naduh ki por mynshwa haba kum kane ka jingpang la hap beit ban puid heh ne open-heart surgery, hynrei da kane ka rukom sumar kaba mynta ka long kaba shngaiñ bad ym donkam ban puid heh na ka bynta kito ki nongpang kiba lah ban ïoh ïa kane ka jingsumar, bad kane ka wanrah ruh ïa ka jingkoit kaba kham sted bad ka jingsumar ruh kaba kham bha.
Ka Dr Joy Shome, Senior Consultant Cardiology bad Head jong ka TAVR/TAVI, kala ong, “Ka jinglah ban pyndep da kaba jop da ka Meghalaya ia ka jingleh ïa ka jingsumar TAVI kaba nyngkong ka pyni ïa ka jingkiew ha ka liang ban ai jingsumar bad ka jinglong ba la pynkhreh da ki kynhun jong ki nongsumar ha ka thaiñ shatei lam mihngi ban ai ïa ki jingsumar kiba katkum ka juk ba mynta na ka bynta ban sumar ia ki jingpang klongsnam”.
