Da ka Awareness Programme bad jingïalehkai paralok pynlong ka KJP Synod Sepngi Urban Mission ha Mawkyrwat

Mawkyrwat, Jylliew 24: Ka Khasi Jaiñtia Presbyterian Synod Sepngi Urban Mission lyngba ka Counselling Centre Mawkyrwat, ha ryngkat ka jingïatreilang bad ka ophis jong u District Social Welfare Officer, South West Khasi Hills District, ka la rakhe ïa ka International Day Against Drug Abuse and Illicit Trafficking halor ka phang, “Breaking the Cycle: Stop Organised Crime”, ba la pynlong ha Madan Artificial Turf, MDSA, Nonglang, South West Khasi Hills District.
Ha kane ka prokram, u Bah Robert June Kharkahrin u la long kum u Kongsan ha kaba u la shim ruh ïa ka bynta ban pule ïa ka pledge ne ka jingphah shim jingkular na ka bynta baroh kiba la wan sha ka jingïalang bad haba pynbud ïa ka jingkren u la pynpaw ka jingaikhublei na ka bynta ka Khasi Jaiñtia Presbyterian Synod Sepngi Urban Mission lyngba ka Counselling Centre Mawkyrwat kaba la pynlong ïa kum kine ki jait prokram ki ban long ka jingkyrsiew thiah na ka bynta kiba paidbah nongshong shnong bad kyrpang eh ïa ki nongñiah kali ki ban sa long ki nongrah khubor sha ki para nongñiah kali bad kumjuh ki nongshong kali halor ki jingsniew kiba ktah na u drok.
Ha kajuh ka por ula ai jingmut ïa ki nongñiah kali ba lada ki don kano kano ka jingkwah jingshai halor kiba bun ki kyndon aiñ kiba ïa dei bad u drok bad kiei ki lad ki lynti ba ki dei ban leh lada shah talasi ïa ka kali jong ki, u long uba la kloi ban ai jingpynshai halor kane ka kam.
Haba kren halor ki drok la ka long ka kyiad lane ki dei ki jingdih kiba pynbuaid, u kynja bad kiwei de, u bah Robert u la ai jingpynshai ba kine ki lah ban pynïap ïa ka jingïadei jong ngi bad U Blei, ki pynïap bad pynïakhlad ha ka jingïadei bad kiba ha ïing ha sem, ha ka imlang ka sahlang, bad kaba khadduh u pynïap ïa ka jingim jong ngi ki briew, ïa ka met ka phad namarkata ka long kaba donkam ba ngi kiar rai mar rai dieng na kine lyngba ka jingkut jingmut ha ryngkat ka jingïarap jong U Blei bad na ki Counselling Centre ba ka Urban Mission ka don.
Kumta u Robert u la ai jingmut ba ka long kaba dei ba ngi dei ban ïakhun pyrshah ïa u drok bad ki kam khaïi be-aiñ kiba wanrah shibun ki jingeh ha ka long briew ka man briew, ha ïing ha sem, ha ka imlang sahlang.
Ha ka sngi ka sngi la don ryngkat naduh u Pastor E.C. Marweiñ uba dei u Director ka KJP Synod Sepngi Urban Mission, u bah S.S. Marbaniang, Counsellor jong ka KJP Synod Sepngi Urban Mission, u Bah Y.G. Lyngdoh, President ka Mawkyrwat Drivers and Owners Association, bad u Bah Stalyne H. Diengdoh, ki pastor, ki nongñiah kali lem bad kiwei ki riew rangbah.
Kum shibynta jong ka jingrakhe ïa kane ka sngi pyrshah ïa u droks, ka KJP Synod Sepngi Urban Mission ka la pynlong ruh ïa ka jingïalehkai paralok ne ka Friendly Match kaba dei halor ka phang, “World Drugs problem: Persisting issues new challenges, Innovative response”. Ka jingïalekai ka long hapdeng ka kynhun Western Pastor United bad ka Mawkyrwat Drivers & Owners Association ha kaba ka Mawkyrwat Drivers & Owners Association ka la jop da 3 – 1 kol ïa ka Western Pastor United.
Ha kaba kut jong ka prokram ka la don ruh ka jingsam ïa ki jingaisngew sha baroh kiba la wan ïashimbynta bad kyrpang ïa ki ar tylli ki kynhun kiba la shimbynta ha ka jingïalehkai kynjatbol.