Haduh 300 unit ka bording elektrik ha ka shi bnai sha ki 10 million ki longïing lyngba ka jingpyndait ïa ki kor solar ha tnum ïing

Shillong, Jylliew 23: U Myntri Rangbah ka Jylla Conrad K Sangma mynta ka sngi ula pyniaid ïa ka jingialang bishar kam halor ka jingpyntreikam ïa ka PM Surya Ghar: Free Electricity Scheme ha State Guest House, Taraghar, Shillong. Ha kane ka jingialang la wan ban ia shim bynta da ki Ophisar na ka Tnad Power, Meghalaya Power Distribution Corporation Limited (MePDCL), Meghalaya Energy Corporation Limited (MeECL) bad kiwei kiwei ki kynhun ba don bynta.
Ka jingialang kala shong bishar ia ka jingiaid jong ka PM Surya Ghar Scheme, ka flagship programme ka Sorkar India kaba thmu ban ai ei haduh 300 unit ka bording elektrik ha ka shibnai sha ki 10 million ki Longiing lyngba ka jingpyndait ia ki kor solar ha tnum Iing. Hapoh kane ka skhim, ki longiing ba lah ban ioh ia ka skhim, ki lah ban ioh ia ka jingiarap song pisa na ka Sorkar Pdeng ba kot haduh T.78,000 na ka bynta ban pyndait ia ki kor solar ha tnum iing.
Ki Ophisar kila batai ia u Myntri Rangbah halor kaei kaba long ba man mynta jong kane ka skhim ha Meghalaya bad pynpaw ia ki jingeh kaba ktah ia ka jingpdiang jong ki longiing. La pyntip ha ka jingialang ba katba ka subsidy ka Sorkar India kala pynduna shibun ia ka jinglut ban pyndait ia ki kor solar, ki nongpyndonkam ha Meghalaya ki dang iai bteng ban mad ia ka jinglut kaba bun haba sdang namar ki daw kum ka jinglut haka kit ka bah, ki jingeh ba iadei bad ka jinglong ki jaka, bad ka jingdon duna bha ha ki jingpyndait ia ki kor ha ka Jylla.
U Myntri rangbah ula shong bishar ia ki jingshem na ki pilot rooftop solar project bad iakren ia ki lad ki lynti ban pynjanai ia ka jinglah ban pyntrei bad jingkhring ban pyndait kor solar na ka bynta ki longiing. Ka jingiakren kala pynleit jingmut ruh halor ka jingnang pynbun ia ki jingmyntoi jong ki nongpyndonkam, pynduna ia ka por ban ioh pat ia ka pisa, bad ban peit ia ki lad ki lynti ban nang ai shuh shuh ia ki jingkyrshan khnang ban pynshlur ia ka jingwan iashimbynta ba kham bun ha kane ka skhim.
Ka jingialang kala bishar ruh ia ki lad ki lynti ban pyniaid lang ia ka PM Surya Ghar bad ka prokram ba dang iaid jong ka Sorkar Jylla ba iadei bad ka renewable energy, kynthup ka Chief Minister’s Solar Mission. La ban jur kyrpang ha kaba wad ïa ka jingpynïasoh lang ïa ki battery storage ban ailad ïa ki longïing ba kin ïoh ïa ki jingmyntoi kiba heh tam na ki kor solar ha ki tnum ïing, nang ai ia ka bording ba shaniah, bad pynduna ïa ka jingshaniah ha ka bording na ka grid ha ka por ba don jingdawa kaba heh.
Ki ophisar kila wanrah ia ki jingtyrwa ban pynbun ia ka jingpynrung ia ki kor solar ha ki tnum iing lyngba ki jaka treikam ka Sorkar, ki skul, ki anganwadi centre bad kiwei kiwei ki jaka paidbah. U Myntri Rangbah ula bthah ia ki Tnad ba kin ithuh ia ki kabu ban pyntyllun sted ia ka jingpyndait kor solar ha ki jingtei ka Sorkar haba pyndonka ruh ia ki jingiarap ka Sorkar Pdeng.
Ka jingïalang ka la ïakren ruh halor ki rukom treikam kiba thymmai ban wanrah ïa ka jingsngewthuh paidbah bad ban pynshlur ia ka jingiashimbynta ki shnong ki thaw ha ka jingpyndait ia ki kor pynmih bording na ka sngi.U Myntri Rangbah u la ai jingmut ban pynïadon bynta ïa ki jaka pule bad ki kynhun samla ha ki kam pynsngewthuh paidbah ban kyntiew ïa ka jingpdiang ïa ka jingpyndait kor solar ha ki tnum ïing bad ki rukom tyngkai ïa ka bording ha ka Jylla baroh kawei.
U Myntri Rangbah ula ban jur ruh ia ka jingdonkam ban wad ia kilad ki lynti ba kham iar ha ka ban pynmih bording renewable energy bapher bapher kiba iahap bad ka rukom long ki jaka jong ka Meghalaya. Kine ki kynthup ia ka jingpynmih bording na ka biomass bad ka biogas, ki micro-hydel, bad kiwei pat ki teknoloji kiba dang mih thymmai kiba lah ban ai ïa ki lad pynmih bording kiba neh slem ha ki jaka nongkyndong bad kiba jngai.
Haba pynkut ia ka jingiapang, u Myntri Rangbah ula bthah ia ki Ophisar ba kin pynkhreh ia ka lynti treikam (roadmap) kaba bniah ban pyniar ia ka jingpdiang ban pyndonkam ia ki renewable energy ha Meghalaya, da ka jingpynleit jingmut halor ka jingpynkhlain ia ka jingiashimbynta u paidbah, pynkhlain ia ka jingpynsngewthuh paidbah, ban klop lang ia ki prokram pynmih bording na ka sngi, bad wad ia ki technology kiba lah ban iarap ia ka Jylla ba kan lah pyndap ia ka jing donkam bording hadien habud.