Shillong, Jylliew 23: U MLA barim jong ka West Shillong u Bah Mohendro Rapsang, mynta ka sngi u la leit ban pyniasoh noh ïa lade bad ka Bharatiya Janata Party ha ryngkat bad ki spah ngut ki nongkyrshan.
Ha kane ka sngi ba u Bah Rapsang u la pyniasoh bad ka BJP ha ryngkat bad ka jingsakhi lang ruh da u State President ka BJP Meghalaya Unit u Rikman Momin, u Myntri Sorkar jylla u Bah Sanbor Shullai nalor kiwei pat.
Kum ban shu kdew ba ha u 2018 u Bah Rapsang u la jop nyngkong eh ia ka election na ka party Congress bad ha ka election jong u snem 2023 u la iakhun noh na ka National People Party (NPP) bad mynta ka kynti u la pyniasoh noh sha ka BJP.
Na ka liang u Bah Mohendro Rapsang haba kren ha ka jingialang u la ong,”Nga dap da ka jingkmen ba nga la pyniasoh bad ka BJP mynta ka sngi bad hapoh ka jingialam u Myntri Rangbah Duh u Narendra Modi ka Inida mynta kala kiew sted bha” u la ong.
“Ka BJP kala kdew shai ba ngi dei ban sngap ia ka jingangnud ki paidbah bad dei halor kane ka bynta ngan pyniaid sha khmat ia ki kam bad nga kular ban trei hok na ka bynta ka jingbha jong ki paidbah nong shong shnong”
Shuh shuh u la ong, Ngan trei shitom na ka bynta ka jingbha bad ka jingkiew shaphrang jong ka jylla bad kumjuh ruh jong ka ri hi baroh kawei lyngba ka jingkyrkhu haba nga sdang ia kane ka lynti iaid ba thymmai jong nga.
Haba ia kren bad ki lad pathai khubor u State President u la ai khublei ïa u Bah Mohendro Rapsang halor ka jingwan ban pyniasoh ka jong u sha ka party BJP ha ryngkat bad ki spah ngut ki nongbud bad ki nongkyrshan.
Mynta ka sngi lyngba ka jingrung u Bah Rapsang sha ka BJP kan dang pynkhlain shuh shuh ia ka party bad khamtam eh ha West Shillong Constituency namar ba u don ka jingiadei kaba jan bha bad ki paidbah ong u Rikman uba dei u State President ka BJP Meghalaya.
Haba kylli la u Bah Rapsang u lah ban long u kyrtong ha kane ka elekshon, ula bynrap “Kane kam shong ha nga, kane ka dei ka parliamentary election (kaba hap ban rai da ki nongialam na Delhi)”.
