Shillong, Jylliew 23: U Symbud Myntri Rangbah ba khmih ïa ka tnat Transport u Ma Sniawbhalang Dhar u la ong ba ka Sorkar Jylla kan sdang ban ai laisen noh ïa ki nongkamai kali arshaka ba pynïaid da ki kompani (aggregator) bad ki nong kamai shimet hapoh ki ar taiew ban wan, hadien ka jingïalang kaba la buh ban long ha ka taiew ban wan.
U Ma Sniawbhalang u la ong ba yn ai laisen lyngba ka bor jong ka Sorkar Jylla sha baroh ki nongaplai kiba dei hok ban ïoh lada ki biang lut ki ki kot ki sla ba donkam katkum ka aiñ.
“Ngan don ka jingïalang ha ka taiew ban wan, kumta hadien shiphew sngi ne ar taiew, ngin sa ai laisen ïa kino kino kiba pan permit, kata kynthup ïa ki riew shimet ne ki Company (Aggregator), lada ki biang lut ki kot ki sla katkum ka aiñ bad ka laisen kan dei katkum ka bor jong ka Sorkar Jylla” ula ong.
U ma Sniawbhalang ula ong ba la bthah ïa ki heh jong ka tnat Transport bad ki bor pynïaid kali ban pynjur ïa ka jingpynjari bad ban leh pyrshah ïa ki arshaka kiba kamai khlem don laisen.
“Nga la bthah ïa ki ophisar jong nga ban pynkhlaiñ ïa ka jingdon ha ki surok bad ban shim khia ïa kito kiba treikam beaiñ” ula pynpaw.
U Symbud Myntri Rangbah ula bynrap ba ka tnad ka dang lum jingtip halor ka jingdon kiba Apply license bad kumjuh ruh ka jingdon kiba kamai da arshaka. ïa ki jingkhein ba thikna halor ki laisen ba la ai yn sa tip kham bniah ynda la pyntreikam pura ïa ka rukom treikam”.
“Ki jingtip ngi dang lum haduh mynta. Ngi dang dei ban pyntreikam pura, shisien ba la pyntreikam pura, nangta ngan sa lah ban ïathuh katno ngut ki la ïoh laisen” ula ong.
