Wanrah jingeh kawei ka nala ha Ïewduh, naba julor kawei ka slab, syrtok ki nongdie bad ki nongthied

Shillong Jylliew 23: Tang hadien katto katne bnai ne snem tam ba ka Sorkar jylla ka la mang pisa kyrpang na ka bynta ban pynbha briew ban pynitynnad bad ban maramot ïa ki jaka, ki jingtei bad ki lynti ïaid kjat kiba la jot la pra bad kiba la julor, hynrei kane ka jingmaramot kaba la pyndep dang hapdeng katto katne por hynrei la shem pat ba ki la sdang ban julor.
Ïa kane la lap ha kawei na ki lynti ïaid kjat kaba don hajan ka basa jhur kaba dei ruh ka slab kaba la tap ïa ka nala na kane ka basa kaba la julor bad kumjuh ruh ba ka um jaboh napoh ka nala ka la mih lut shabar jong kane ka lynti ïaid.
Kane ka lynti ïaid kadei ruh ka ban mih sha basa die phan piat, bad ba ju shong ruh da kiba ju die soh die kait bad kiwei ki jingdie.
Haba ïakren bad katto katne ngut kiba die jingdie ha kane ka lynti ki bym kwah ïathuh kyrteng ki la ïathuh ba kane ka jingjulor katei ka slab jong ka nala ka la long la slem bha bad bun ruh ki briew ha ka jingbym poi pyrkhat ne ïohi ki la liat bad ngam ki kjat jong ki ha kane ka thliew nala kaba dap da ka umktieh kaba jaboh bad sma.
“Hateng hateng ngi mad ïa ka jingsngew sma iwtung bad sngew jakhlia bha wat ban shongdie jingdie hajan kane ka nala, na ka daw ka jingmih jong ka um jaboh kaba mih shabar na kane ka nala,” ong ki katto katne ngut kiba die jingdie ha kane ka Basa.
Ki la pynpaw ka jinglyngngoh ba watba ka la don ka jingmaramot ïa ka Ïewduh bad ïa ki basa bapher bapher hynrei sha kane ka liang pat dang don ki jingbym pat shna thymmai, kumta ki la kyrpad ïa ka Dorbar jong u Syiem ka Hima Mylliem ban khmih lem ïa kane ka jingeh kaba ki la mad kaba long ruh na ka bynta ka jingbha jong kiba bun Balang kiba ïaid ne kiba wan thied jingthied bad kumjuh ruh kiba shong dukan hapoh Ïewduh.
Halor kane, ka jingjurip u nongthoh khubor la shem ba ïa kane ka nala bad ka slab kaba la julor la shu thep da ki maw kiba heh tang ban ïoh ïaid ki briew kiba wan ïew ba wan hat bad kumjuh ruh kito kiba ju ïaid bha na kane ka lynti naba kadei kaba lam ruh sha ka basa jur, basa die phan ne piat bad kumjuh ruh sha kiwei pat ki basa kiba kongsan bha kiba dei ki marbam.