Nongstoiñ, Jylliew 22 : Ha kane ka lah sng u Blei ka 22 tarik Jylliew ki nongïalam bad ki dkhot jong ka kynhun ai snam sngewbha kaba la tip kum ka West Khasi Hills Dsitrict Blood Donors Organisation ha ryngkat bad ka jingïatreilang bad ki Doktor kiba pynïaid ïa ka jaka buh snam jong ka Nongstoiñ Civil Hospital ki la pynlong ïa ka jingaisnam sngewbha na ka bynta ban ïarap ïa kiba pang ba shitom kiba donkam snam kyrkieh ha kano kano ka por. Kumban pynkynmaw ba ha katei ka sngi ka dei ka sien kaba lai ba ki nongïalam bad ki dkhot jong katei ka kynhun ki la noh synñang ïa ka snam jong ki ha katei ka blood centre.
Ka jingpynlong ïa katei ka blood donation camp ha kane ka lah sngi u Blei ka dei namar ba ka Blod donors day kaba dei ha ka 16 tarik mynta u bnai ka hap ha ka sngi u Blei kumta na ka liang u doctor bad ki nongïalam ka kynhun ki la hap ban pynbeit bad pynkynriah noh ïa ka tarik .H akatei ka sngi ka jingaisnam ka la sdang naduh ka por 10.30 a.m haduh ka por 12.30 pm. Hadien ba la kut ka jingai snam la pynlong ïa ka jingïalang ba lyngkot ha ka hall jong katei ka hospital ha kaba la pynïaid da u bah Lumlang Kharsyiemlieh president ka WKHDBDO ha ryngkat ka jingïa don lang jong u Doktor Eric Wanñiang uba dei peit ïa ka Blood centre jong katei ka hospital .
Ha katei ka jingïalang la ïoh ïa ka jingkren lyngkot na u bah Starvis Kharbani uwei na ki dkhot uba la ai snam sngewbha haduh arphewhynriew sien .U bah Kharbani haba ai jingkren ha katei ka sngi u la ong ba ka jingïarap ïa kiba pang ba shitom kiba donkam snam kyrkieh ha kano kano ka por ka dei kaba kognsan tam. Ha kajuh ka por u la ong ba ki don shibun ki briew kiba pynsheptieng da kaba ong ba ka jing ai snam ka ktah ïa ka jingkoit jingkhiah jong uba ai hynrei kam long satia kumta namar u sngewthuh shai ba wat la u la ai snam haduh arphewhynriew sien ruh um sngew don jingsngewpher ha ka met ka phad bad ka jingkoit jingkhiah jong u.
Nalor kata u la kyntu ruh ïa ki para nongshong shnogn hapoh ka district ba kim dei ban sngap bad ngeit ïa kaei kaba ki bym pat tip ki ong namar ha kaba ïadei bad kino kino ki bynta kiba ktah ïa ka jingoit jingkhiah jong ka met u briew dei tang ki doctor kiba la pule bad leit pyntbit ha katei ka bynta kiba tip kham bha. Khatduh eh la ïoh ïa ka jingkren na u Doktor Eric Wanñiang ha kaba u la ong ba ka blood centre jong ka Nongstoiñ Civil Hospital ka dei kaba dang shibit shen bad ka jingshakri jong katei ka centre ïa ki nongpang kam pat dap san snem hynrei ka la ïoh pdiang ïa ka khusnam na ka sorkar India kum ka blood centre kaba ba paka tam ha kaba ai ka jngshakri ha kaba ai snam ïa kiba pang ba shitom.
Ha kajuh ka por u la ong ba naduh ba ka kynhun jong ki nongai snam sngewbha ka la sdang ï ban noh synñiang da ka snam jong ki sha katei ka cntre ki la don haduh khyndai spah laiphew hynriew ngut ki nongpang kiba don kam snam kyrkieh kiba la ïoh jingkoit lyngba ka snam ba ka kynhun ka la ai ha katei ka cntre. Khatduh eh u la kyntu ïa ki dkhot ka kynhun ba kin pynsgewthuh lem ïa ki lok ki jor, ki hynmen ki para, kiba ha ïng ha sem ba kin wan shakhmat ban noh synñiang snam ha katei ka cntre namar kan ïarap shibun lada ki don ki ba ha ïng ha sem, ki khun ki kti ki kur ki jait kiba shitom bad don kam snam kyrkieh ki lah ban ïoh na katei ka centre khlem kano kano ka jingsiew dor. Ha katei ka sngi la sam ruh ïa ki syrnot bad momntoes sha baroh ki dkhot jong ka kynhun .
