ïoh khusnam Gold SKOCH ka ECD Mission ka Meghalaya ha ka kam pynsan ïa ki khyllung khynah

Shillong, Jylliew 22 : Ka jingpyrshang jongka jylla Meghalaya ban shim khia ïa ka koit ka khiah bad biang ka bam ka dih ki khyllung khynnah bad ki kmie kiba pun ba kha kaba la tip kum ka Meghalaya Early Childhood Development (ECD) Mission ka la ïoh ka jingithuh ha ki bor halor duh jongka sorkar pdeng bad lyngba kane ka la ïoh ruh ïa ka khusnam Gold SKOCH Award ha ka kyrdan Early Childhood Development ha ka jingïalang ba 108 ka SKOCH Summit Public Policy Forum kaba long ha nongbah New Delhi.
Ka ECD Mission ka Meghalaya, ka la ïoh pdiang ïa katei ka khusnam ha ka kyrdan jong ka Early Childhood Development hadien ka jingshah bishar bniah da ki riewstad bad ki riewshemphang jong ka ri.
Kane ka jingïoh khusnam ka dei ka jingai jingithuh ïa ka jinglamkhmat jong ka jylla Meghalaya ha kaban tei ïa ka rukom treikam kaba janai na ka bynta ka ECD, da kaba buh ïa ka jylla ha ka ri kum ka nongïalam ha ka jingleh ïa kei kaei kaba long thymmai ha ka jingshakri ïa ki paitbah bad ïa ka imlang sahlang baroh kawei.
Ka ECD Mission jong ka jylla kala shah jied hapdeng jong kiba bun tylli ki sienjam kiba la shim ha ka ri baroh kawei bad ka la don ruh hapdeng jong ka jingshah bishar bniah kaba kynthup ïa ka jingai jingbatai kaba janai, ka jingthep vote ki paidbah, ka jingbishar bniah jong ki riewstad bad ki riewshemphang, ki dur, ki video, ka jingwanrah ïa ka jingkylla bad ka jingshah bishar bniah halor ka jingïoh jingmyntoi jong ki paidbah na katei ka Misson.
Ha kane ka jingshah bishar bniah, kane ka Mission ka la pyni ïa ka jinglong kyrpang bad ïa ka rukom treikam ha kaba ïadei bad ka ECD lyngba ka jingïatreilang kaba la lamkhmat da ka Tnad Social Welfare kum ka tnad kaba khmih ïa kane ka kam, kane ka Mission kala seisoh ruh ha ka ban wanrah lang ïa ka tnad ka koit ka khiah, Community & Rural Development Department (MSRLS & SRES), ka tnad pule puthi, ki paralok ne kynhun kiba ïatreilang, ki Balang bapher bapher, ki jaka pule jong ki kynhun bapher ha ka imlang sahlang, ki nongtrei kiba hakhmat eh ha ka koit ka khiah ban kyntiew ïa ka jinglong jingman jong ki khunlung ha ka khyllipmat kaba kongsan tam ha ka jingim ka jongki.
Ka jingïoh pdiang ka jylla ïa ka Gold SKOCH Award kam dei tang ka jingïoh jingithuh ïa ka kam kaba la leh ha ki snem kiba la dep, hynrei kan pynskhem ruh ïa ka jingkular ka jylla ban pynthikna ba man la ki khunlung kin ïoh ïa ka jingsumar sukher, ka bam ba tei, ka jingïada bad ki lad ba kin heh kin san bha.
Ha ka bynta kaba khatduh jong ka jingshah bishar bniah ban ïoh pdiang ïa ka khusnam SKOCH Award, ïa ki jingpyni bad ïa ki jingai ïa ki jingbatai kiba bniah, ïa ka kynhun jongka Meghalaya Early Childhood Development Mission la ïalam da u Bah Ronald Kynta u Chief Operating Officer jong ka Meghalaya ECD Mission, ka Programme Manager ka Kong Nayna Warjri bad u Civil Engineer u Bah Meaibor Hiam Roy M. Pdah.