Ïaid noh na ka surok Shillong-Sohra-Dawki lane Shillong-Jowai-Dawki kyntu u DC ïa ki paidbah
Thui dkut ka surok Shillong-Dawki haneng Laitlyngkot
Shillong, Jylliew 21 : Ka surok kaba pynïasoh ïa ka Shillong – Pynursla – Dawki ka la dkut thui hynin ka miet haneng ka shnong Laitlyngkot hadien ba ka la don ka jingtwa khyndew kaba jur bha.
Kumta, halor kane na ka liang u Deputy Commissioner ka East Khasi Hills, u Abhilash Baranwal ha ka jingpynbna ba la pynmih ha kane ka sngi U Blei u la ong ba namar kane ka jingtwa kaba jia haneng ka shnong Laitlyngkot ka la poi haduh u pud ba la kut syndon ka leit ka wan lyngba katei ka surok ha Chainage 25+200.
“Halor kane na ka liang ka NHIDCL ka la pyntip ba ka jingmaramot bad ka jingshna biang ïa kane ka surok kan shim por kumba katto katne sngi ei ei,” pyntip u DC ha ka jingbthah.
Kumta, u la ong ba na ka bynta ka jingshngain ki paidbah bad khanglad ïa kino kino ki jingjia ba sngewsih, yn khang shipor ïa ki paidbah kumjuh ïa ki kali ban ïaid na katei ka surok Shillong – Dawki naduh shnong Laitlyngkot ter ter naduh mynta haduh ban da pynbna da kumwei pat na ki bor district.
“La bthah ïa ki paidbah kynthup naduh ki nongjngohkai pyrthei ba kin ym ïaid lyngba ka surok Shillong – Dawki hynrei ki lah pat ban ïaid noh na ka surok Shillong – Sohra -Sohbar- Dawki bad na ka surok Shillong – Jowai – Amlarem – Dawki,” la bynrap biang u DC ha ka jingbthah.
Ha kajuh ka por, u la kyntu ruh ïa ki paidbah ba kin kiar na ka leit ka wan lyngba ka surok Shillong – Dawki palat ïa ka shnong Laitlyngkot katba dang khang ïa ka surok. La kyntu ruh ba dei ban bud ïa ki lynti ban pynphai kali bad ki jingbthah ba la pynmih da ki pulit, ki nongpynïaid kali bad ki nongtrei ka NHIDCL.
La kyntu ruh ïa ki paidbah ba ki dei ban da pynkhreh bha ïa ka leit ka wan bad pyllait kham bun ka por ban ïaid.
“Ïatreilang bad ki bor synshar ban shngain bad pynïaid ryntih ïa ka ïaid ka ieng ki kali bad ka jingshngain ki paidbah. Pyntip mardor sha ki nongtrei ba ai jingïarap kyrkieh da kaba phone ha u number 112,” la bynrap shuh shuh.
Ha kajuh ka por la kyntu ruh ïa ki paidbah ba ki dei ban mud pyrkhing ïa ki jingmaham shaphang ka suiñbneng ba la pynmih da ka Indian Meteorological Department.