Halor ki khyrdop KHADC ba khlem Tender Notice hynrei la shu khot thep da ka EC: Barikupar

Shillong, Jylliew 21: U MDC ka United Democratic Party (UDP) uba mih khmat ïa ka Shella Constotuency u Bah Barikupar Synrem u la kynnoh ba kane ka Executive Committee (EC) ba la ïalam da ka Voice of the People Party (VPP) ha KHADC ki kam bad ka ktien kim ïaid ryngkat kumjuh kumjuh.
Haba kren bad ki lad pathai kubor u Bah Barikupar Synrem u la ong, “Kaba lyngngoh bad thamula ka long ba mynshem snem haba kylli halor ki khyrdop na u CEM ha kito ki por u dang dei kum u EM u la ong ba ha ka jinglyngkot palat ka por ym banse ym lah shuh ban ai da ka Tender Notice bad ai noh da ka application”.
“Mynta ha ka jingïaid jong ka por lah dap shi snem kaba sngewlyngngoh ba haduh mynta ka sngi kam pat mih ka tnder notice hynrei haba wad jingtip kylleng kylleng ngi ioh ba ka khubor ki khyrdop (Gate) ki lah dep ïaid lyngba ka application bad na ka liang ka ophis bun ki ophisar kim tip bad ngi ruh kum ki MDC ngim tip ba ka lah ïaid application” ong u Bah Synrem.
Kane ka la long thik kum ka kyntien ka ba ki ju pyndonkam bha ha ka ktien nongwei (Fovourtism ne ka Nepotism) ne kaba jied ïa ki briew lajong, la kynnoh u Bah Synrem.
“Ha ka step sngi Thohdieng nga la buh da ka zero hour notice halor ka jingmih khubor ba 6 tylli ki khyrdop KHADC tang ha Surok Riangdo, Athiabari kynnoh ka AMLA hynrei kala shah kyntait noh” u la iathuh.
U Bah Synrem u la ong,Kine ki khyrdop kiba la mih kidei jong ka tnad Revenue, Forest bad kiwei.
Shuh shuh u la ong, “Ha ka jingshisha ngi la khmih lynti ban ioh ïa kren ïa kane hynrei kaei ba sngewsih ka long ba ki lah kyntait noh ïa kane ha ka jingong ba ka jingduna palat ka por bad ha ka por ba ong ka jingduna ka por nyngkong nga ruh nga pdiang hynrei haba kut ka sngi wat ba ngin kren ïa ka amenmend ngi shah khang noh ka lad bad kane ka long kaei kaei ba sngewsih ba kum ki nongmih khmat ngim ioh ban kren namar ka jaitbynriew”
Halor kane u Bah Synrem u la ong ba ka liang ïatei kaba don ha KHADC kan hap pan jingshai na ka EC namar ba kam ktah tang ïa ngi hynrei ka ktah hi ïa ka jaitbynriew.
U Bah Synrem u la ong man ka por ka sorkar ka ju shah kynnoh ba ka don ka jied tang ïa ki briew lajong ha ki tnad trei kam bapher bapher, hynrei mynta ngi iohi na ka por sha ka por ki khynnah samla ki kwah ïa kata ka jingtrei kam kaba shai bad kaba khuid (transparency) hynrei kaei kaba jia hangne pat kam don satia ka jingtrei kam kaba shai.
“Man ka por phi ju ioh sngew ba ka VPP ka ïeng ha kata ka nongrim ngin ïa bud ïa kata ka jngtrei kam ba shai bad ngin ai kata ka jingshai sha u paidbah hynrei kaei kaba jia mynta pat ka lah long lut da khongpong kaei ka ktien bad kaei ka kam ba ki leh bad ka ktien ba ki kren kam iahap bad kam iaid ryngkat kumjuh kumjuh” ong u Bah Synrem.