Leit kynduh ka KSU- SWBC ïa u symbud CEM JHADC ba pynslem ai sanad ïa u Waheh Shnong Huroi

Khliehriat Jylliew 20: Ka Khasi Students’ Union (KSU), South West Border Circle, hapoh ka jingïalam u President, u samla Wanlam L Gadew bad u Vice President, u samla Kampher Pohthmi lem bad ki dkhot, ka la ïakynduh ïa u Deputy Chief Executive Member (Dy. CEM),ka Jaiñtia Hills Autonomous District Council, u bah Bah Lasky Rymbai bad u Executive Member ka JHADC uba peit ïa ka Elaka Rymbai, u Bah Moonlight Pariat bad ka seng ka la ïakren halor ka jingbym pat ai Sanad Waheh Shnong ïa u Bah Raja Suchen uba la jied da ki paidbah ban long u Waheh Shnong ka shnong Huroi halor kane ka seng ka la buh ruh da ka dorkhas ha JHADC.
Ki nongïalam ka KSU na East Jaiñtia Hills District kiba la leit synran lang ki kynthup u samla Hamewanpynhun Ryngkhlem, Cherity Suja, Shwari Ryngkhlem, u Pynshai Kupar M Dkhar, publicity KSU Central Executive Council bad kiwei kiwei.
Ha ka jingïakynduh ïa u Deputy Chief Executive Member (Dy. CEM), Bah Lasky Rymbai, bad la ïoh ruh ban ïakren ruh bad u Executive Member ba peit ïa ka Elaka Rymbai, Bah Moonlight Pariat, ha ophis jong ka Jaiñtia Hills Autonomous District Council (JHADC) bad ka seng ka la aiti ïa ka dorkhas ha kaba ka seng ka buh ka jingdawa ban pynshai halor ka jingbym pat ai Sanad ïa u Waheh Shnong ba la shah jied da ki paidbah jong ka shnong Huroi.
Na ka liang ka KSU South West Border Circle ka la pynpaw bad ong ba ki paidbah nongshong shnong ka Huroi ki sngewkhia jur namar ka jingpynslem palat ka JHADC ban ai ka jingithuh bad ban ai Sanad ïa u Waheh Shnong ba la jied da ki paidbah.
“Ha ka jingïakren bad ka seng, u Deputy CEM bad u Executive Member ki la pynthikna ïa ka Union ba ka Council kan shimkhia ïa kane ka mat bad kan peit bniah ïa ki jingdawa bad ki jingsngewkhia ba la buh ha ka dorkhas bad ong ruh ba ka Council kan leh ïa kaba donkam katkum ka aiñ bad na ka bynta ka jingmyntoi jong ki paidbah shnong Huroi,” ong u kyrwoh.
“Ka Khasi Students’ Union (KSU), South West Border Circle, ka khmih lynti ïa ka jubab kaba shai halor ka dorkhas ba la buh bad ka seng ka ai por 10 (shiphew) sngi ïa ka Jaiñtia Hills Autonomous District Council (JHADC) ban peit bniah ïa kane ka kam bad ka seng ruh kan sa shim ïa ki sienjam kiba donkam halor kane ka mat.
Ka KSU ka don ka jingkyrmen bad ka jingshaniah ba ka Council kan pyndep ïa la ki kamram bad ki jingkitkhlieh kaba katkum ka aiñ bad ka bor ba la pynkup kaba hapoh ki kyndon jong ka Sixth Schedule jong ka Riti Synshar ka Ri India, khnang ban pynbeit ïa kane ka kam na ka bynta ka jingmyntoi jong ki paidbah shnong Huroi.
Ka Union ka ngeit ruh ba ka Council, kum ka bor ba dei peit ïa ka synshar shnong bad ka jingtreikam jong ki shnong hapoh ka jylla, kan shim ïa ki rai kiba donkam khnang ban pynthikna ba ki paidbah shnong Huroi kin ïoh ïa ki hok bad ki jingshakri paidbah kiba dei hok ban ïoh. Ka Khasi Students’ Union (KSU), South West Border Circle, ryngkat bad ki paidbah shnong Huroi, kin nang bteng ban buddien ïa kane ka mat bad khmih lynti ba ka Council kan shim ïa ki sienjam kiba biang hapoh ka por ba la buh, khnang ban wanrah ïa ka jingïoh jingïada ïa ka hok, ka synshar paidbah bad ka jingmyntoi jong ki paidbah ka shnong Huroi.