Shillong, Naitung 20 : Ka elekshon MLA ha Pynthorumkhrah kaban long ha u 2023 kan shongshit bha namar hadien u MLA ba mynta, Bah AL Hek, nangta u MDC Bah PN Syiem la mih sa uwei pat u kyrtong, Bah Rocky Hek ba dei ruh u pyrsa kur jong u Bah AL uba la pynbna ba un aireng lang ha katei ka elekshon kaban long ha u snem ban wan.
U Bah Rocky haba kren bad ki lad pathai khubor ha kane ka sngi Balang u la pyntip ruh ba ka jingmih jong u ban ïakhun na ka tiket NPP kadei hadien ba u ïohi ba ha katei ka party ka don ka mynsiem ïarap bad ïatrei lang kaba um ju ïohi ba kan don ha kiwei pat ki party khamtam ha ka party ba u don mynshwa.
“Nga kwah ban tyrwa sha ki paidbah ka Pynthorumkhrah kum uwei u soh ba phin mad nga thiang ne nga jew bad lada nga jew tang shisien hi phin ailad bad lada nga thiang sa buh symbai,” u la ong haba kren bad ki lad pathai khubor.
U Bah Rocky u la kubur ruh ba ka jingïakhun pyrshah ïa u Bah Hek uba dei u mama jong u kadei kaba eh bha namar u la jop la 25 snem kumjuh ruh ïa u MDC Bah Pynshngaiñ Syiem. Tangba, u ong pat ba um don jingartatien ba ki paidbah kin pdiang ïa u hadien ba u la pynbna paidbah ïa ki nongrim treikam.
Katto katne ki thong treikam ba utei u rangbah u buh thong ban kyntiew ïa ka constituency ka long naduh ka jingïakhun ban don noh ki college ha jaka lajong khnang ba ki samla pule jong ka constituency kin ym da donkam ban leit shaduh Laitumkhrah ne kham jngai ban bteng ïa ka jingpule.
U la ong ruh ba dalade hi un leit ban kyrpad na u Myntri Rangbah kumjuh na u Symbud Myntri Rangbah ban pynïoh lang ïa ki jaka ïalehkai kum ki madan phutbol kumjuh ki madan basketball khnang ba ki samla ka thaiñ kin ïoh ban pynlut ïa ka por ba ki lait ha ki jingïalehkai ym ha ki kam kiban ktah ïa ka koit ka khiah jong ki.
