Shillong, Naitung, 20: Ka All Meghalaya Contractor’s and Suppliers’ Association ha ka sngi Balang ka la pyntip tnad Labour jong ka Sorkar Jylla ka ladep phah da ka jingthoh sha ki tnad treikam ba ki Kontraktor kim donkam shuh ban rejistar na ka bynta ka Labour Licence lada dei ka kam kaba dei hapoh 50 ngut.
U Vice President jong ka Associotion u Bah Precious Sumer ha ka jingïakren bad ki lad pathai khubor u la ïathuh ba lada ki Kontraktor ki pyntrei ïa ki kam kiba don palat 50 ngut ki nongbylla sngi kin hap ban rejistar hadien ba la ïoh ïa ka Work Order katkum ka Meghalaya Labour Law (Amendment) Act, 2020.
U la ïathuh ruh ba ka Association ka la phah da ka jingthoh ban pyrshah ïa ka jingthmu jong ki tnad treikam bapher bapher ka Sorkar Jylla ban pynbor ïa ki Kontraktor ban pynrung kyrteng ïa ki nongbylla hapoh ka Employees Provident Fund katkum ka EPFO Act namarba kane ka aiñ ka dei na ka bynta ki kompeni, ki karkhana kiba heh.
U la pynshai ruh khnang ba ki nongbylla kin don ka jingshngaiñ ka Sorkar Jylla ka la wanrah ïa ka Welfare Board bad ki tnad ki khate shi persen na ki projek kum ka Labour Cess kaba leit sha kane ka Board.
Shuh shuh u Secretary jong ka Association u Bah Emmanuel Syiem Malngiang u la ïathuh namar ka jingpynslem jong ka Sorkar Jylla ban pyllait ïa ki Bill kiba sahkut jong ki kontraktor kiba pyntrei ïa ki jingtrei jong ki tnad bapher bapher ka la pynlong ïa ka Association ban leit ïakren bad u Commissioner and Secretary ba dei peit ïa ka tnad Pla Tyngka u Vijay Kumar.
Haba pyntip ïa ka jingmih na ka jingïakren, u Bah Emmanuel u la ïathuh ba u Commissioner and Secretary u la pyntip ba ka tnat Pla Tyngka ka ladep pyllait ïa ka pisa T. 50 klur na ka tnad PWD halor ki kam maramot.
Une u nongïalam u la ïathuh ruh ba u Kumar u la pynpaw hashwa ban kut u bnai Naitung, 2022 ka Sorkar kan sa pyllait lut ïa ka pisa kaba sah na ki tnad bapher bapher.
