Donkam ban sumar nyngkong eh ïa ki tyllong um: BDO Mawkyrwat

Mawkyrwat, Jylliew 18: Ka ophis jong u Executive Engineer ka Public Health Engineering (PHE) jong ka Mawkyrwat Division, mynta ka sngi ka 18 tarik u Jylliew 2026, ka la ïoh ban rakhe ïa ka sngi kyrpang jong ka umbam umdih kaba dei lyngba ka Jal Jeevan Mission ne JJM kaba la tip kum ka ‘Jal Arpan Diwas’ ha ka Community Hall jong ka Shnong Rangthong, South West Khasi Hills District.
Ka jingthmu jong kane ka program ka long ban pynpaw ba ka Jal Arpan Diwas kam dei tang ka jingkut jong ka jingpyntei ïa ki projek jong ka umbam umdih, hynrei ka dei ka jingsdang jong ka jinglong trai bad jingkitkhlieh jong ki paidbah nongshong shnong ban sumar, pynkhuid bad pynneh pynsah ïa ki tyllong jong ka umbam umdih.
U bah I. Lawrynñiang, MCS, Block Development Officer ka Mawkyrwat C&RD Block, u la long kum u kongsan ha kane ka prokram bad ha kajuh ka por ula shim ruh ïa ka bynta ban pule ïa ka pledge ne jingpynsmai ïa ki dkhot jong ki Village Water & Sanitation Committee (VWSC), ki paidbah nongshong shnong ba kin trei shitom ban sumar bad pynneh pynsah ïa ki tyllong um na ka bynta ka jingmyntoi ym tang mynta hynrei jong ka pateng ban wan kumjuh.
Haba bynrap ïa ka jingkren, u la kyntu ïa ki paidbah ba kin nang bteng ban ïa ka jingïasnohkti lang bad ka ophis treikam jong u PHE da kaba ai ka jingpynsngewthuh ha ki paidbah ba ban pynneh pynsah ïa ki projek jong ka umbam umdih bad ban pynthikna ba ka um kan neh, u la ai jingmut ba ka long kaba donkam ban sumar nyngkong eh ïa ki tyllong um kiba long ka jingïoh bynta ba kordor tam jong ki paidbah nongshong shnong namar lada ki tyllong um kim biang, ka um ruh kan nym ai ha ngi ïa kaba ngi donkam.
Shuh shuh u bah Lawrynñiang u la ai jingmut ruh ba ki top um, ki pipe um ruh ki dei ban biang khnang ba ka jingdonkam jong ka um ban ïaid 24 kynta ha ki longïing kan treikam pura, bad kaba kongsan ka long ba lada ka um ka poi ha ki ïing ki sem, kum ki nongpyndonkam ki dei ban pyndonkam ha ka rukom kaba dei khnang ba kan long ka um kaba khuid ba suba bad ym dei ban leh pathar ne leh katba mon.
Ha kane ka jingïalang, la donlang ruh u bah K. Nongbsaw, Executive Engineer ka PHE Mawkyrwat Division, u bah K. Nongrem, Myntri Shnong Rangthong uba la ai ïa ka jingkren pdiang sngewbha, bad u bah Archimedes Nongrem, Chairman ka Village Water & Sanitation Committee (VWSC) jong ka Shnong Nongdewsaw, ryngkat bad kiwei pat ki riew rangbah shnong, ki dkhot Village Water & Sanitation Committee (VWSC) bad ki paidbah.
Shuh shuh ban pynsngewthuh ha ki nongwan ïashimbynta ha kane ka jingrakhe, ka la don ruh ka jingïaphylliew jingmut kaba long hapdeng ki dkhot Village Water & Sanitation Committee (VWSC), ki nongkitkam na ki 12 tylli ki shnong kiba kynthup ïa ka Shnong Rangthong, Mawthynrew, Photjaud-Rangthong, Ngunraw, Kensimphlang, Wahbamon, Keniong, Nongkynbah, Nongpdengkenbah, Thieddieng, Sarin, bad Rangjadong bad ki nongtrei jong ka ophis PHE Mawkyrwat Division, kaba la long hapoh ka jingïalam u bah K. Nongbsaw, Executive Engineer ka PHE Mawkyrwat Division.