Jubab kiei ki jingpynkhreh ban rat dyngkong ïa ki kam be-aiñ hapoh 15 sngi bthah u Katakey ïa ka Sorkar
Halor ka jingtih bad khaïi dewïong be-aiñ
Shillong, Jylliew 17 : Ka Committee u BP Katakey ha ka kaiphod ba 38 ba la ai sha ka ïing Bishar High Court jongka jylla ka la bthah ïa ka sorkar jylla ban pynkhreh ïa ki lad ki lynti kumno ba kan leh ban rat dyngkong syndon ïa ka kam tih bad khaïi dewiong beaiñ hapoh 15 sngi ha ka jylla Meghalaya.
“ Haba pynkhreh ïa kane ka plan kumno ban leh da ka sorkar ha baroh kawei ka jylla bad ban pynkut ïa kane ka kam beaiñ hapoh 15 sngi ka long ka kam kaba kyrkieh bad donkam eh” ong ka Committee.
Ka Committee ka la bthah ba ha kane ka jingpynkhreh ne ka plan dei ban kdew kiei ki jaka ba jur ka jingtih beaiñ, kumno ban buh ïa ki bor pahara hapoh ka jingpeit jingkhmih u ophisar uba don ka jingkit klieh, ban ai kaiphod man la ka sngi sha u Deputy Commissioner bad SP, ban buh ïa ki khyrdop talasi bad ki police outpost bad ban ai jinghikai ïa ki briew sorkar kat kum ka MMDR Act, Rules bad ki SOP.
“ Dei ban don ruh ki kyndon ban pynshitom ïa ki ophisar ne kino kino lada lap ba ka jingtih bad khaïi dewiong beaiñ ka dang ïaid ha ka jaka ba la buh ïa ki ban peit, namar khlem kino kino ki jingpynsaja ki ophisar bad ki briew ba la buh kin ym pyntreikam pyrkhing ïa ki kyndon” ong ka kaiphod.
Halor u dewiong uba la dep die lilam ka la bthah ba dei ban ai noh ïa ka Mineral Transport Challans ha kaba ïadei bad u dewiong ba 23,903 MT hadien ba la pynbiang ïa ki kot ki sla ba donkam da kiba la thied ïa u dewiong ba lilam bad nalor kata ban shah ban shalan noh ïa u dewiong na kito ki jaka ba la lum thup ïa utei u dewiong.
Kiwei kiwei ki jingbthah ki long ban leit jurip ïa kito ki jaka lum thup ïa udewiong ba la aibor da ka CIL, ban aiti noh ïa kito ki jaka bym shym pyndonkam sha ki trai, ban pynshisha halor ki karkhana Coke ha South West Khasi Hills naduh 1.1.2026, ban pynkut oh kloi ïa ka mukotduma ha ka Khliehriat PS Case No 106(3) 2026, ban pynithuh ïa ka metiap ba la lap na ka krem dewiong ba la shu iehshrah bad ban siew bailutksan sha ka kurim bad ki khun ki kti jong u Mosaid Ali.