Phah khang ka Committee u Justice Katakey ïa baroh ki par tih dewïong ’Liewkhnai be-aiñ ha ka jylla

Shillong, Jylliew 17 : Ka Committee u Justice BP Katakey ka la ai jingmut ïa ka Sorkar Meghalaya ba kan wanrah mardor ïa ka policy ha ka ban khang khyrdep lut ïa baroh ki par dewiong ba tih ’Liewkhnai hapoh ka Jylla hadien ka jinglap ïa kawei ka metiap u briew bym lah ban ithuh na kawei ka par dewiong ba shu iehshrah ha East Jaintia Hills.
Ha ka 38th Interim Report bala aiti sha ka Iingkashari Meghalaya High Court, ka Committee ka la kdew ïa ka jingïoh tam ïa ka metiap ba la pyut jong u briew na ka par ba jylliew 50 phut bad ba la shlei um ha Mulait Bri Sumer myn ha ka 10 tarik Jymmang, 2026.
Ka post mortem ka batai ïa ka daw ka jingiap ba dei na ka jingnguid um bad ka sngi ba u iap ka long kumba 2 taiew eiei.
Ka Committee ka ong ba ka jinglap ïa ki metiap na ki thliew par dewiong ba shu ïeh khlem jingker, ka pyni ïa ka jingma kaba ap ïa ka jingim ym tang jong ki jingri jingdup hynrei jong ki briew ruh kumjuh.
Kala pynpaw ba ki don “palat 22,000 tylli kum kine ki thliew par dewiong” ha Meghalaya, kynthup ha East jaintia Hills, kumba la buh jingthoh ha ki kaiphod kiba hashuwa.
Ka Committee ka ong “ka long kaba kongsan ban don ïa ka plan ban khang dam ïa ki par bad ban shna jingker noh mardor ïa ki thliew par dewiong ba shu ieh tad haduh ban da khang syndon ïa kine ki par, ka dei kaba kongsan bha ban bat ïa ka hok tynrai ban im kat kum ka Article 21”.
Kala kyntu ïa ka Sorkar Pdeng ban wanrah ïa ka policy ha ka ban btep noh ïa baroh ki thliew par dewiong ba tih ’liew khnai bad ban pyntreikam hapoh ka por ka ban buh.
Ka Committee ka la ai jingmut ruh ban ithuh noh mardor ïa ka metiap bad ban siew ïa ka bai lutksan namar ka jingbym lah ban ïada ïa ka hok tynrai une u briew.