Shillong, Jylliew 17: Ka Federation of Khasi, Jaintia & Garo People (FKJGP) ka la dawa ïa ka tnad ka koit ka khiah ka jylla, ba ka dei ban nym pynbor ïa ki khynnah ba kin shim ïa u Aadhaar ha ka por ba ki leit ban phah sumar kyrkieh bad ong ba kane ka jingbuh kyndon kaba buh ïa ki longïing na ki jaka nongkyndong “ha ka jingeh kaba khraw bad jingpynkhuslai”
Ha ka shithi kaba la phah sha u CEO ka State Nodal Agency jongka Meghalaya Health Insurance Scheme, u President ka FKJGP u Bah Dundee Cliff Khongsit ula ong ba ki kmie ki kpa man la ka por kila shah pynbor ban pyni ïa ka Aadhar Card jong ki khynnah ban ïoh ïa ka jingshakri ha ka jingsumar hapoh jong ka MHIS Scheme, ka jingpynrung ne Admission, ka jinglum jingtip ïa ki kot ki sla ne ka jingai jingïarap ha ki jingjia kiba kyrkieh”.
Ula pynpaw ba bun ki longïing na ki thaiñ nongkyndong kim shym la pynrung kyrteng ne register ïa ki khun namar ki daw ki bym lah ban batai.
Ka Federation ka la pynkynmaw ïa ki bor khmih ba u Aadhaar um long uba kongsan ban ïoh pdiang ïa ki jingshakri kiba kongsan, khamtam haba ka jingkyntait ïa katei ka lah ban ktah jur ïa ka hok ha ka ban ïoh jingshakri na ka bynta ka bha ka miat jong ki nongshong shnong kumba la rai da ka Supreme Court.
Ka FKJGP ka la ong, ba bun na ki nongshong shnong ha nongkyndong ki la ïai bteng ban mad ïa ka jingeh bad jingshah pynslem wat haba ki kmie ki kpa ki dei kiba lah don ïa u Aadhaar uba dang treikam.
“Kane ka rukom leh shilliang khmat ka buh jingeh ia ki longïing kiba duna ha ka ïoh ka kot bad ïa ki paidbah ha ki thaiñ nongkyndong” la pynpaw ha ka shithi.
Da kaba kdew ïa ki jingdkoh ha ki jaka pynrung kyrteng, u Bah Khongsit ula thoh “Kiba bun ki jaka rejistar ne Registration Counter ki treikam suki bha ha kaba hap ban ap slem bha bad kiba bun ki Centre kim shym la treikam da ki sngi namar ka jingthud ha ki kor ki bor, ka jingbym don ïa ka kor internet ne ka jingduna ban don ïa ki briew kiba trei ïa ka kam”
Ula bynrap ba “Ki kmie ki kpa ryngkat bad ki khun bad ki khynnah kiba dang rit, ki la mad ïa ka jingeh ha ka bor met bad ka pisa ka tyngka namar ba ki hap leit bunsien” bad ka maham ba “Ha ki jingjia kiba donkam kyrkieh, ka jingpynslem ki la mih namar ka jingpan ïa u Aadhaar kaba lah ban buh ha ka jingma kaba khraw ïa ka jingim briew.
Ka FKJGP ka la kyrpad ïa ka Tnad ban “Ai ka jingbthah kaba shai kdar ïa baroh ki jaka ai jingsumar bad ïa ki tnad ba ym dei ban kyntait ne pynslem ban ai ïa ka jingai ïa ka jingsumar kaba kyrkieh namar ka jingbym don Aadhaar ki khynnah” bad “Ban pdiang ïa kiwei pat ki phom ban pynshisha ne ki Aaadhar jong ki kmie ki kpa haba donkam”.
Ka la kyrpad ruh ba dei ban pynkhlaiñ ïa ka jingpynrung kyrteng ha ki thaiñ nongkyndong ban pynbun ïa ki nongtrei bad ban khmih bniah bha ïa ki Registration Counter kiba lah don lypa.
“Ngi kyrpad ba phin tuklar mardor halor kane ka mat bad ngi kyrmen ba phin shim ïa ki lad ban ïaleh ban pynbeit noh mardor ïa kane ka kam” la ong ka FKJGP.
