Kyntu ka Meghalaya ban pynbeit thymmai ïa ka jingker sainar shiah ha Shnong Lyngkhong

Shillong, Jylliew 17 : U Symbud Myntri Rangbah ka jylla uba dei peit ïa ka tnad kam pohïing u Bah Prestone Tynsong ula kyrshan ïa ka project ker sainar shiah ha khappud jong ka jylla hynrei u kyrpad ïa ka Sorkar pdeng ba kan pynbeit thymmai ïa ka jingker sainar shiah ha ka shnong Lyngkhong ka Raid Nongskhen namar ka jingker ka la phiah ïa mar shiteng ka shnong shabar ka jingker bad pynduh ïa ki jaka rep.
Haba pynshai ïa ka nongrim jong ka Jylla, u Bah Prestone ula ong “Ki paidbah ka Jylla kim don ka jingpyrshah ïa ka jingker sainar. Ka jingker sainar ha khappud ka dei kaba hap ban leh bad ka long kaba donkam bha”. Ula pynsngew ïa ki jingeh kiba mih na ka jingpynbeit ïa ka jaka kiba dei ban pynïaid ïa ka jingker ba mynta.
“Ha ka jingker sainar, kaei kaba jia, kum ka nuksa, katto katne ki shnong kum ka shnong Lyngkhong bad katto katne kum ka Raid Nongskhen, jan mar shiteng na ka shnong ki la don shabar ka jingker. Kaba ar ka long, ki jaka rep ba ki ju pyndonkam man la u snem ruh ki la hap shabar jong ka jingker” ula ong.
U Dy CM ula pyntip ba ïa kane ka kam lah dep ban ïakren hapoh ka Sorkar Jylla bad yn sa rah ïakren shen sha Delhi. “Ngi kwah ruh ban pyntip sha ka Sorkar Pdeng halor kane ka mat. Lada long kaba lah, ngi kyrpag ïa ki ba kin kham hiar sharum, lehse shajan u zero line, khnang ba ki jaka ba ngi don bad ba la pyndonkam ha ka rep ka riang kin ym shu duh ei. Hooid, ngin sa ïakren bad ka Sorkar Pdeng” bynrap u Bah Prestone.