Shillong, Jylliew 16: Ka dorbar mang tyngka kaba lai sngi jong ka Khasi Hills Autonomous District Council na ka bynta u snem mang tyngka 2026-27 kan sdang ha ka sngi Balang ha kaba ïa ka mang tyngka yn sa wanrah hapoh ka ïing dorbar jong ka KHADC.
Katkum ki tyllong khubor la ïathuh ba na ka liang ka Liang Ïatei kin sa wanrah ïa ki mat ïakren hapoh ka Ïing dorbar khamtam eh ha kaba ïadei bad ka tnat Elaka kaba peit ïa ki it ki hima kiba hab hapoh u pud u sam ka KHADC namar bun ki hima ki la don tang ïa ki khlieh nongsynshar kiba shipor.
La ïathuh ruh ba kan don ka jingïakren ha kane ka dorbar mang tyngka ha kaba ïadei bad ki khyrdop khrong musur kiba dei jong ka District Council kiba don ha kylleng ki jaka kiba hab hapoh ka jingpeit ka KHADC, nalor kiwei kiwei pat ki mat kiba kongsan ki ban ïatai hapoh kane ka Dorbar Mang Tyngka.
