Shillong, Jylliew 16 : Kat kum ka khubor ba la ïoh lum mynta ka sngi, la ïathuh ba ka Jingkieng Rymphum ha Wah Myntang ha ka surok ban leit na Laskeiñ sha Barato, ka la orpait wak napdeng. Ka daw ka long ba ka Load capacity jong katei ka jingkieng ka lah ban kit tang kumba 9 Matric Tonne ei ei; hynrei ha kine ki khyndiat bnai ba la leit noh, ka la don ka jingïaid sadhuhjong ki Truckload kiba kit shyiap palat pud. Kaba kham sngewlyngngoh shuh shuh ka long ba wat ki Truck kit dewiong jong ki suba high level kiba wan na ki thaiñ Shangpung, Raliang kiba kitpalat 30- 40 Matric Tonne ki ïaid khlem pyrwa nalor jong katei ka jingkieng.
Na ka liang jong ka Public Works (Roads) Department (PWD) ka la pyrshang ban pakhang da u nar angle ha ka height kaba 3.00 M ei ei khnang ban khanglad ïa ki kali heh ba kit overload, hynrei ka tyllong khubor ka ïathuh ba ki driver bad handyman jong kita ki kali kitdewïong, kitshyiap ki la tangon pynkdiah syndon ïa kita ki nar ba pakhang da ki tyrnembah. La kynnoh ba ki kali kit dewïong lei ki ïaid shimiet shimiet haduh ban pynhap ïa u dewïong ha Depot jong ki ha Mookhengkheng, ka jaka kaba don hapdeng ka Barato bad Mukroh, nangta pat ki sa pynkit da kiwei pat ki kali ban shalan sha Assam. Ki paidbah ki kylli kumno ki truck ki ïoh ban ïaid sadhuh haba ki hap ban ïaid lyngba nakhmat jong ka Barato Police Outpost ?.
Katei ka jingkieng Rymphum ka long ka Single suspense Lane Bridge kaba la rim bha, hynrei ka jingshna ïa ka Jingkieng thymmai harum jong katei ka jingkieng ruh ka la ïaid shait shait bad ki païa ruh la dep ban tei baroh arliang bad kan nym slem shuh ban pun sa ïa ki Girder ne ki narlyntang na shiliang sha shiliang. Hynrei ka jingkylli ka long, lada jia kano kano ka jingjia ba sngewsih ïa ki nongleit nongwan ha katei ka jaka, mano ban kitkhlieh ?.
Nalor nangta, ka jingmaramot ïa kane ka surok tang kaba jngai kumba 17 Kms na ka scheme Periodical Repair dangshen ka long kaba stang bha bad ka bym shym la design na ka bynta ki heavy load, sa tang katno kan pra biang phum. Hato ka sorkar kan shu phai da ka khmat matlah halor jong katei ka jingleh be-aiñ ?, satang ka por ban batai.
