Halor u dewïong 22 tarik khot u CM ban ïakren bad sngap ïa ki paidbah: Kyrmen Shylla

Shillong, Jylliew 16: U Myntri Rangbah ka jylla u Conrad K Sangma ha ka 22 tarik mynta un khot ïa kren ïa ki nongialam jong ka Jaiñtia Coal Dealer and Miner Association (JCDMA) ha ka jingdon lang ryngkat bad u MLA ka Khliehriat u Bah Kyrmen Shylla bad ruh ka MLA jong ka Sutnga Saipung, Kong Santa Mary Shylla ban ïa kren halor ka kam tih dewiong.
Ïa kane la pynbna da u Bah Kyrmen Shylla uba dei u MLA ka Khliehriat hadien ba ma u lem bad ka kong Santa Mary kila leit ban ïa kynduh ïa u Myntri Rangbah ka jylla u Conrad K Sangma ha ka ïing sah jong u ban pynsngew ïa ki jingdawa jong ka JCDMA.
Haba ïa kren bad ki lad pathai khubor u Bah Kyrmen Shylla uba dei u MLA ka Khliehriat ha kajuh ka por uba dei ruh u Chairman jong ka tnad Mining u la ong, ha ka jingïakynduh ïa u Myntri Rangbah u la ai por ha ka 22 tarik mynta u bnai ban ïakynduh ïa ki dkhot jong ka JCDMA ha ryngkat ka jingsynrang lang ki ar ngut ki MLA.
“Ha ka 22 tarik ngin ïa phylliew jingmut lang hapdeng ka JCDMA bad u Myntri Rangbah bad ruh ban ai noh ïa ka presentation ha khmat u Myntri Rangbah ha ryngkat ka jingdon lang Symbud Myntri Rangbah kat kiba ïalait bad ki ophisar jong ka tnad bapher bapher” ong u Bah Kyrmen.
Shuh shuh u la ong,”Ngi sngewkem ba kane ka jingai lad u Myntri Rangbah ka pyni ba u Myntri Rangbah u la shim khia ïa kane ka kam da kaba u pyllait ïa ka por ba kordor”.
U Bah Kyrmen u la ong ba kane ka presentation kan shim por palat shi kynta ban pyni ha khmat u Myntri Rangbah bad na ka liang u Myntri Rangbah u la kular ban ai ïa ka por ba kordor jong u bad ngi ngeit skhem ba kaei ba ngi pyni ha u Myntri Rangbah kan long kaei kaei kaba u Myntri Rangbah ban kren lem sha ka sorkar India.
Shuh shuh u Bah Kyrmen u la pynpaw ba ki shanniah ha u Myntri Rangbah ba hadien ba la dep ban aiti ïa ka presentation, u Myntri Rangbah un leh ïa kaba donkam ban ioh plie noh ïa ka kam tih dewiong hapoh ka jylla.
U Bah Kyrmen u la ong, Nga da kwah eh ba ki paidbah nong shong shnong ka jylla jong ngi ban ym dei ban don kata ka jingsngew politik ne ka jingsngewniam ka jingsngew shimet hynrei to ngin leh ïa kane na ka bynta u paidbah.
“Ngi ïakhun ïa kane ym na ka bynta ka burom ne ban ioh nong ha ka sain pyrthei, hynrei na ka liang jong nga kaei kaba nga sngew nga kyrpad ïa kiwei de ba kin don kata ka jingsngew ban gin ïaleh na ka bynta u paidbah” ong u Bah Kyrmen.