Da ki khusnam pisa bad shithi thungkam sam ka sorkar sha ki nongïalehkai ba kynsai ka jylla

Shillong, Jylliew 16 : Ka Meghalaya ha ka sngi Ba-ar ka la pynlong da ka lympung jingkynduh lang lane ka Meghalaya Sports Conclave 2026 ha Shillong da kaba lum lang khrui ïa baroh ki nongïalehkai kiba kynsai kiba ka jylla ka la sei ha ki jait jingïalehkai bapher bapher.
Ha kane ka conclave la wan bynta naduh ki nongïalehkai ba la paw ha ka pyrthei bad ha ka Ri, ki riewshemphang kiba dei bad ki kam ïalehkai bad ruh u Myntri Rangbah ka Jylla, Conrad K Sangma, u Myntri ka tnad Sports Bah Wailadmiki Shylla bad u Vice President ka World Athletics, Dr. Adille Sumariwalla nalor ki heh sorkar bad kiwei kiwei.
Ki nongïalehkai kiba pawnam ha ka pyrthei bad ha ka ri naduh ka Manu Bhaker kaba la khur takma ha ka Olympik bad World Champion, nangta u rangïalehkai hockey ba khur takma ha ka Olympic u PR Sreejesh, ka thei mareh ba la khur ruh ïa ka Arjuna Award ka Hima Das, u rangïalehkai ba khur takma ha ka Paralympic u Harvinder Singh bad ka Sheetal Devi kaba dei ka World Archery Para Champion ki la sam ïa ki jingmut jingpyrkhat bad kiei ki sienjam ba kum ki nongïalehkai ki dei ban pynleit jingmut ban poi sha ka thong ryngkat ki jingkyrshan ba ki ïoh.
Katkum ka jingong jong u Myntri Rangbah, ka sorkar jylla ka la pyntrei ne pynkhreh haduh kumba 240 tylli ki projek jingïalehkai ha kylleng ka jylla bad kane ka jingïaid lynti kan kiew sha palat 500 tylli ki projek haduh u snem 2028. Ka sorkar ka la mang ruh T.72.5 klur ban pynkhreh ïa ka Team Meghalaya na ka bynta ka National Games.
U la ong ruh ba naduh u Jylliew 2025, palat 50,000 ngut ki samla nongïalehkai la ithuh lyngba ki prokram wad sap bad palat 1,200 ngut ki dang ïoh jinghikai kaba paka ha ki jingïalehkai bapher bapher.
Haba kren ha kane ka jingïalang, u Conrad K Sangma u la ong ba ka jingbei tyngka ha ka jingïalehkai kam dei tang na ka bynta ki takma, ne kawei ka shithi thung kam lane kawei ka stadium hynrei ka long ban plie lad ïa ki samla ban kiew shaphrang ha ka jingim.
“Ka jingkylla kaba khraw tam ha Meghalaya ka long ka jingkylla ha ka jingmut jingpyrkhat jong ki paidbah, kaba la pynlong ïa ka jylla ban don ka jingsngewskhem ban pynlong ïa ki jingïalehkai kiba heh bad ban tei ïa ki jingtei kiba lah ban pynlong ïa ki lympung kiba heh ba heh ha ka pyrthei bad ruh ban ïa beh thong lang bad ki jaka ïalehkai kiba paka tam ha ka ri,” u la ong.
Ha kane ka jingïalang u samla Pynshngaiñ Kurbah, uba la jop takma rnong ha ka ïakob king lieng (canoeing) ha ka lympung ïalehkai 38th National Games 2025, u la long u ba nyngkong eh ban ïoh pdiang ïa ka Meghalaya Outstanding Sportspersons Direct Appointment Policy (MOSDDP) lane ka shithi thungkam na ka bynta ki nongïalehkai kiba khur takma ha ki lympung kiba heh ha ka ri.
Nalorkata, la pynkup burom ruh ïa bun ngut bad bun tylli ki kynhun kiba la wanrah ïa ka nam bad ka burom ïa ka jylla ha ki lympung ïalehkai ba ki mih la ka long ha ka lympung ïalehkai jong ka ri ne wat shabar ri ruh kumjuh.
Shwa kane, u Myntri ka tnad Sports Bah Wailadmiki Shylla u la ong ba kane ka conclave ka wan ha ka por kaba kongsan bha ha kaba Meghalaya ka dang pynkhreh ban pdiang ïa ka National Games. U la ban jur ba ka jingïoh jingjop kan ym dei tang ha ka jingjop takma hynrei ha ka jingtei ïa ka rukom jingïalehkai kaba khlaiñ, ka jingpynbiang ïa ki coach kiba paka, ki jingtei bad ka jingai mynsiem ïa ki samla.
La pyntip ruh ba kumba T.40 klur la dep pyllait sha ki Synjuk Ïalehkai bapher bapher ha ka bynta kaba nyngkong, katba T.23.37 klur la buh kyrpang na ka bynta ki lympung ai jinghikai pyntbit, jingïakhun leit kilan met, jingbam tei met bad kiwei kiwei ki prokram ban kyntiew ïa ki nongïalehkai.
Na ka liang u Dr. Adille Sumariwalla u la ai jingïaroh ïa Meghalaya halor ka jingshah jied ban pynlong ïa ka National Games bad u la ban jur halor ka jingdonkam ban wad bad kyntiew ïa ki sap na shnong haduh ka kyrdan ba hakhlieh duh.
Katba ka jylla ka dang ap ïa ka 39th National Games, ka sorkar ka thmu ban pyndonkam ïa ka jingïalehkai kum ka lad ban pynkupbor ïa ki samla, ban kyntiew ïa ka ïoh ka kot bad ban wanrah ïa ka roi ka par ha ki shnong ki thaw jong ka jylla.